Galicia é a terra dos Hugos e das Noas, ou cando menos iso parece nos últimos anos. Hugo é o nome máis común entre os nenos galegos nacidos dende o 2008, por diante dos Mateo, Pablo, Daniel ou Martín. E Noa é, igualmente, o máis escollido para as nenas dende o 2012, superando a Sara e Lucía, que dominaran nos anos anteriores, e a outros, como Daniela, que semella facerse cada vez máis popular.
Os Hugos e as Noas estanse mesmo convertendo nun factor diferencial galego, pois noutras comunidades están lonxe de ser os máis comúns, sobre todo no caso de Noa entre as nenas. No conxunto de España, en 2013 Daniel foi o máis utilizado para os varóns, por diante de Hugo, Alejandro, Pablo, Álvaro e Adrián. Para as mulleres, dominan Lucía, María, Paula, Daniela e Sara. Analizando os datos das distintas comunidades autónomas, atopamos que Daniel domina en Aragón, Extremadura, Madrid, Castela-León, Castela-A Mancha, Valencia, Cantabria, La Rioja e Asturias, Marc en Baleares e Catalunya, Alejandro en Andalucía e Murcia, Iker en Navarra, Markel en Euskadi e Hugo en Canarias. De igual xeito, Lucía e ó nome máis habitual en Aragón, Asturias, Cantabria, Castela-León, Castela-A Mancha, Valencia, Madrid e La Rioja, María en Andalucía, Murcia e Estremadura, Júlia en Catalunya, Paula en Baleares, Valeria en Canarias, Irati en Navarra e Ane en Euskadi.
Por suposto, non sempre foi así, e no conxunto do censo, como esta semana volveu revelar o INE, os galegos seguimos sendo un país de Manuel (79.627 en total), José (62.795), José Manuel (37.699), Antonio (36.990), Jesús (23.770), José Luís (26.187), José Antonio (25.568) e Francisco (20.253). No caso das mulleres, no conxunto da súa poboación en Galicia somos unha terra de María Carmen (63.474), María (45.145), Carmen (35.343), Josefa (21.581), María Dolores (20.347) e María Pilar (19.971).
Os nosos apelidos tampouco son moi singulares; dominan os Rodríguez, os Fernández, os González, os López, os García, os Pérez ou os Vázquez
Os nosos apelidos tampouco son moi singulares; dominan os Rodríguez (cun total de 113.145), os Fernández (107.460), os González (84.653), os López (79.896), os García (76.737), os Pérez (60.525) ou os Vázquez (47.725). Isto si, con algunhas particularidades a nivel provincial: García é o apelido máis frecuente na Coruña, pero tan só o cuarto en Lugo, o quinto en Pontevedra e o oitavo en Ourense. Pola contra, López, apelido máis común en Lugo, é o terceiro na Coruña, o sexto en Ourense e o oitavo en Pontevedra.
2003 | 2004 | 2005 | 2006 | 2007 | 2008 | 2009 | 2010 | 2011 | 2012 | 2013 |
---|---|---|---|---|---|---|---|---|---|---|
Pablo | Pablo | Pablo | Pablo | Pablo | Hugo | Hugo | Hugo | Hugo | Hugo | Hugo |
Alejandro | Alejandro | Alejandro | Hugo | Hugo | Pablo | Pablo | Mateo | Mateo | Mateo | Mateo |
Hugo | Daniel | David | Daniel | Daniel | Adrián | Daniel | Pablo | Pablo | Martín | Pablo |
Daniel | David | Daniel | Alejandro | Adrián | Alejandro | Adrián | Martín | Daniel | Pablo | Nicolás |
Diego | Hugo | Hugo | David | Diego | Daniel | Mateo | Daniel | Martín | Daniel | Daniel |
David | Diego | Diego | Adrián | Alejandro | Diego | Martín | Diego | Adrián | Nicolás | Martín |
Adrián | Adrián | Adrián | Diego | David | Brais | Brais | Adrián | Nicolás | Diego | Manuel |
Manuel | Manuel | Martín | Martín | Brais | David | Lucas | Brais | Diego | Adrián | Alejandro |
Brais | Brais | Brais | Manuel | Manuel | Manuel | Diego | Lucas | Alejandro | Alejandro | Lucas |
Miguel | Miguel | Manuel | Brais | Lucas | Mateo | Alejandro | Alejandro | Manuel | Manuel | Diego |
Os nomes máis comúns en Galicia para os varóns acabados de nacer (2002-13). Fonte: INE
2002 | 2003 | 2004 | 2005 | 2006 | 2007 | 2008 | 2009 | 2010 | 2011 | 2012 | 2013 |
---|---|---|---|---|---|---|---|---|---|---|---|
María | Lucía | Lucía | Lucía | Lucía | Lucía | Lucía | Lucía | Sara | Sara | Noa | Noa |
Laura | Paula | Laura | Paula | Laura | Sara | Sara | Sara | Lucía | Lucía | Sara | Sara |
Sara | Laura | Paula | Laura | Sara | Paula | Paula | Paula | Noa | Noa | Lucía | Daniela |
Alba | María | María | María | Paula | Laura | Noa | Noa | Daniela | Daniela | Daniela | Lucía |
Lucía | Andrea | Andrea | Sara | María | Noa | Uxía | Uxía | Paula | Carla | Sofía | Carla |
Andrea | Sara | Sara | Nerea | Alba | María | Carla | Carla | Carla | Paula | Carla | Sofía |
Paula | Alba | Alba | Alba | Carla | Alba | María | Alba | Alba | Sofía | Alba | Martina |
Nerea | Nerea | Uxía | Carla | Noa | Carla | Laura | Daniela | Laura | Alba | Paula | Alba |
Marta | Marta | Carla | Andrea | Antía | Uxía | Alba | Laura | Sofía | María | Martina | Paula |
Ana | Uxía | Nerea | Uxía | Andrea | Antía | Antía | Antía | Uxía | Laura | María | María |
Os nomes máis comúns en Galicia para as mulleres acabadas de nacer(2002-13). Fonte: INE
Nomes 'xeracionais'
Afondando nas estatísticas que recolle o INE pódense analizar os sucesivos cambios, nomes que pola súa frecuencia mesmo podemos identificar cunha década ou xeración concreta. Abonda con sumar os datos dos nacidos na pasada década, a primeira do século XXI. Vemos como entre os nacidos entre o 2000 e o 2009 en Galicia son máis os Pablo, Alejandro, Daniel, Adrián ou David. E tamén as Lucía, Laura, Sara ou Paula. Nesta década, hai uns poucos anos, Noa non aparecía nin entre os dez nomes máis frecuentes, onde si entraba Hugo, pero en posicións moito máis atrasadas que na actualidade.
Os oitenta foron tamén unha época de irrupción e popularidade de nomes como Raquel, Silvia, Noelia, Iria, Vanesa, Verónica, Roberto, Marcos, Miguel, Iván ou Carlos, que hoxe semellan ter pasado a un segundo plano nas preferencias de nais e pais
Se imos unha década máis atrás, até os noventa, atopamos que o nome máis común era Adrián, seguido de David, Daniel, Sergio, Diego ou Alejandro. Nas mulleres era Laura, seguido de Sara, Andrea, Alba ou María. Os oitenta foron anos de David e de Pablo, e tamén de Rubén, Alberto ou Daniel. Foron tamén unha década marcada polas Cristina, Patricia, María, Beatriz, Vanesa, Marta ou Andrea.
Os oitenta foron tamén unha época de irrupción e popularidade de nomes como Raquel, Silvia, Noelia, Iria, Vanesa ou Verónica, que hoxe semellan ter pasado a un segundo plano nas preferencias de nais e pais. Tamén era máis habitual atopar nenos chamados Roberto, Marcos, Miguel, Iván ou Carlos, hoxe fóra dos quince ou vinte máis frecuentes. De igual xeito, na década dos noventa aparecen entre os vinte nomes máis utilizados Nerea, Antía, Sandra, Lorena, Tamara ou Tania. E tamén os Brais, Cristian ou Borja, hoxe algo menos frecuentes.
Os setenta foron unha época de grandes cambios, e iso nótase moitísimo nos nomes que recibían os galegos e galegas nacidas antes e despois
Os setenta foron unha época de grandes cambios, e iso nótase moitísimo nos nomes que recibían os galegos e galegas nacidas antes e despois. Deste xeito, nos nenos e nenas que pasaron polo rexistro nesta década predominan os nomes compostos con José no caso dos homes, e María no das mulleres. María Carmen, María José, Ana María son os máis habituais, aínda que tamén aparecen as Mónica e as Patricia. José Manuel, Manuel ou José Antonio dominan nos varóns, por diante de Javier ou Óscar.
A sociedade mudaba máis lentamente nas décadas de ditadura, polo que a listaxe de nomes máis frecuentes nos anos cincuenta e sesenta é case idéntica á dos setenta. Ademais dos xa referidos hai moitos Antonio, Jesús e Francisco; e tamén moitas Carmen, María Dolores, María Pilar ou Josefa. Tan pouca variación había que máis de dous de cada dez rapaces levaban José no nome, e case catro de cada dez nenas tiñan María como primeiro ou segundo patronímico.
Como curiosidade, a situación era un chisco diferente antes do ano 40
Como curiosidade, a situación era un chisco diferente antes do ano 40. Manuel, José e María eran os nomes máis habituais en Galicia nos anos 20 e 30, pero non de forma tan absoluta coma nas décadas seguintes, deixando máis espazo para os Antonio, Ramón, Francisco ou Jesús. E tamén para as Carmen (o nome máis habitual para as mulleres galegas antes de 1940), Josefa, Rosa ou Concepción.