O pasado 22 de abril o Parlamento aprobou por unanimidade unha proposición non de lei, a iniciativa de AGE a partir dunha proposta da asociación querENDO Mulleres con Endometriose, que lle demandaba á Consellaría de Sanidade que formase un grupo de traballo para estudar a atención ás mulleres con Endometriose en Galicia. O acordo parlamentario pedíalle á Xunta que no prazo de seis meses ese grupo lle presentase á cámara un informe de conclusións. Superados xa eses seis meses e á vista de que non había novidades, o BNG formulou unha pregunta na Comisión de Sanidade, obrigando o Director Xeral de Atención Sanitaria, Ramón Ares Rico, a comparecer. Con todo, as súas explicacións semellan non ter contentado as demandas das afectadas por esta doenza, que en Galicia suman ao redor de 60 mil mulleres.

"A conclusión da súa comparecencia é moi insatisfactoria para as mulleres con endometriose", sinala a asociación

"A conclusión da súa comparecencia é moi insatisfactoria para as mulleres con endometriose", sinala a asociación, que "en vista de que enriba da mesa quedaron moitas preguntas sen respostar, e outras contestadas sen evidencias sobre a veracidade da resposta" vén de dirixirse por escrito á Consellería "pedindo que se clarifiquen os termos da mesma". Despois de agradecerlle a súa comparecencia, sinalan que "observamos que hai algunhas luces esperanzadoras á situación que as mulleres con endometriose soportamos na atención sanitaria do Sergas", pero engaden que na intervención de Ares Rico "vimos con preocupación algúns elementos que non deixaron de parecernos pouco tranquilizadores".

QuerENDO salienta que "o atraso diagnóstico segue a cifrarse en 8 anos" e que "é falso que o problema estea solucionado dende que se fan ecografías endovaxinais". Denuncian igualmente que os profesionais e as profesionais sanitarias "non recibiron a guía de atención editada polo Ministerio. E que "non están recoñecidas oficialmente as unidades de referencia para ser tratados os casos de endometriose grao IV que son os que o Ministerio considera que se deben tratar en unidades multidisciplinares".

Así mesmo, na carta piden "que se trate especificamente a información ás mozas de 15 a 25 anos co fin de promover os diagnósticos precoces". E solicitan igualmente "información pormenorizada" dos pasos que a Consellería deu para promover a apertura de liñas de investigación sobre endometriose.

"Ao ser unha enfermidade que afecta só as mulleres e que está relacionado co aparello reprodutor e as menstruacións, está moi oculta e é moito máis complexo avanzar na súa investigación e tratamento"

Iria Villar, presidenta de QuerENDO, salientaba hai uns meses en entrevista con Praza que "ao ser unha enfermidade que afecta só as mulleres e que está relacionado co aparello reprodutor e as menstruacións, está moi oculta e é moito máis complexo avanzar na súa investigación e tratamento". A principal demanda das afectadas é a creación de unidades multidisciplinares de endometriose co fin de mellorar a atención ás pacientes que están a ser atendidas no Sergas e evitar que as mulleres galegas con endometrioses profundas teñan que viaxar fóra de Galicia