As mulleres de Ve-la Luz volven á folga de fame. Farano o vindeiro luns 9 de decembro a partir das nove da mañá no seu local coruñés e despois da protesta que as mantivo durante un mes en xaxún e que remataron o pasado 14 de novembro. Menos dun mes despois, oito vítimas da violencia machista e membros deste colectivo volven á loita por segunda vez denunciando a "dobre violencia" que sofren: "a das brutais agresións ás que nos someteron os nosos ex compañeiros e a fría inoperancia, cando non desprezo ou prevaricación, das institucións supostamente creadas para nos protexer".
As mulleres denuncian "unha dobre violencia: a dos maltratadores e a da fría inoperancia ou desprezo das institucións"
As dez mulleres que participaron na anterior folga de fame -rematárona seis polos problemas de saúde de catro delas- reclamaban unha "protección real" para as maltratadas e os seus fillos, pedindo medidas para que, no caso de que haxa indicios de violencia de xénero, se suspendan as visitas e se impida o acceso destes supostos maltratadores á custodia dos nenos, así como que, de haber condena firme, se lle retire a patria potestade e se suspenda o réxime de visitas ao pai. Pedían tamén a renovación do persoal dos xulgados de violencia de xénero cada dous anos e a posibilidade de formación na materia, así como a revisión das sentenzas dos últimos cinco anos, tras os elevados casos de sobresemento.
Non acadaron boa parte das súas reivindicacións, pero si que o Parlamento galego se comprometese a crear unha comisión de investigación sobre a situación real das vítimas e dos seus fillos e nas que elas terán voz, algo que consideran un "fito histórico" e "unha vitoria" que, no entanto, cren que contrasta coa "morea de sinais que chegan desde as institucións" que, segundo denuncian, indican "que a impunidade dos maltratadores e abusadores non só non recibiu un duro golpe, senón que semella que vai resultar fortalecida".
Ve-la Luz denuncia as "represalias" polas súas protestas e a "normalización social e mediática da impunidade" dos maltratadores
Así, aseguran estar "sometidas á barbarie" dun sistema "onde ninguén parece xa querer ou poder cumprir as súas funcións". Porque Ve-la Luz denuncia "as represalias" sufridas polas súas denuncias e critican que a Audiencia Provincial lles decidise de sobreser "por falta de probas" os casos denunciados por cinco das dez vítimas que apareceron nun vídeo onde se censuraba a feble actuación da fiscalía no Xulgado de Violencia de Xénero da Coruña e tras advertir de que o 31% das denuncias presentadas nese mesmo xulgadoo foran arquivadas.
"Isto provoca unha clara falta de confianza por parte das vítimas e fomenta a non denuncia", explican nun comunicado. Este é un dos motivos polos que din volver ao seu peche e á folga de fame co que din denunciar "o crime institucional e o dobre maltrato da estigmatización" dos que din ser "tan só un exemplo". En definitiva, criticas as dificultades e as trabas ás que as mulleres se enfrontan para poder saír do círculo da violencia.
As mulleres censuran que un empresario condenado por abusos promova a través da empresa un centro de ocio na Coruña
Ademais, critican a desprotección dos menores ante os supostos agresores e alertan de que o mesmo luns 9, en canto comecen a folga de fame, outro menor podería ser entregado por decisión a un presunto abusador, algo que advirten que supón "unha aberrante normalidade" en moitos casos, tanto en Galicia como no conxunto do Estado. Ve-la Luz denuncia tamén "a normalización social e mediática da impunidade dos maltratadores e abusadores" e fan referencia ás "reiteradas aparicións" na prensa dun empresario condenado por abusos sexuais e que promove un macrocentro de ocio nun centro comercial da Coruña.
Do mesmo xeito, tamén se sitúan contra "a desaparición de dotacións orzamentarias destinadas á protección das mulleres" e censuran que boa parte destes recursos se destinen "a campañas publicitarias para maquillar a realidade". Por último, tamén denuncian a situación dos Puntos de Encontro Familiar, que, segundo elas, son cualificados por algunhas vítimas como "puntos silenciadores do maltrato".