Dende hai anos cómpre acreditar un nivel B1 nunha lingua estranxeira para obter o título de grao. As universidades permiten acreditar o título mediante a presentación de títulos obtidos fóra da institución, e esta acreditación tamén se pode realizar a través dun curso no centro de linguas modernas (con matrículas con prezos superiores a 150 euros) ou ben presentarse as probas de acreditación que organiza este centro durante o curso. Estas probas de acreditación teñen dúas partes, unha escrita que é a proba coñecida como B1-A, e outra oral, a B1-B, sendo necesario aprobar as dúas para obter o título de grao.
O problema, segundo denuncia Acción Universitaria, é que dende febreiro xa non hai prazas dispoñibles para realizar a segunda parte da proba na USC, nin no campus de Compostela nin no de Lugo. O colectivo sinala que esta circunstancia deixa os e as estudantes que non se matricularan hai bastantes meses nas dúas probas ante o risco de non obteren o seu título de grao en xuño, tendo de agardar até setembro. Ou ante a necesidade, se queren o título en xuño, de ter que recorreren a unha acreditación externa, cun prezo elevado, e para a que nalgúns casos tamén se pechou o prazo de matrícula. Este grupo lembra que a obtención do título en xuño pode ser necesario para a continuación dos estudos noutros centros ou noutro nivel.
O colectivo sinala que "a causa deste problema é a falta de planificación da USC e polo tanto é a universidade a que ten que atopar unha solución para as persoas afectadas, e non ser estas as que teñan que buscala"
Acción Universitaria denuncia que "ante esta situación alarmante a resposta do Centro de Linguas Modernas, que se encarga de facer estas probas na USC, amosa pasividade e declara que por agora non se van a aumentar as prazas, que é a nosa responsabilidade por non prever esta situación". O colectivo sinala que "a causa deste problema é a falta de planificación da USC e polo tanto é a universidade a que ten que atopar unha solución para as persoas afectadas, e non ser estas as que teñan que buscala". Acción Universitaria esíxelle á USC que "amplíe as prazas para realizar as probas de acreditación en lingua inglesa, así como tamén en todas aquelas linguas que non teñan suficientes prazas".