Foi un neno quen, aproveitando este martes a visita dos reis de España ao inicio do curso escolar en Pereiro de Aguiar, entregoulle unha carta á raíña Letizia. No texto explicáballe os problemas que están a sufrir os rapaces con necesidades especiais e aos que a Xunta lles vén de retirar axudas escolares. A convocatoria deste ano para o programa Gratuidade Solidaria -que subvenciona a compra de libros para alumnos de primaria, secundaria e educación especial- queda limitada en exclusividade a "libros de texto". Ata o de agora, as familias con fillos con síndrome de Down empregaban estas subvencións para o material específico que eles deben utilizar e que agora queda exento das axudas.

O programa Gratuidade Solidaria exclúe este ano o material dos nenos con necesidades especiais e só abrangue os libros de texto

Tan só hai unha excepción para que estes nenos si reciban axuda para o seu material escolar en calquera colexio público: no caso de que o alumno ou alumna teña recoñecido un grao de discapacidade do 65% ou máis, algo que é minoritario e que deixaría sen subvención a milleiros de rapaces no país.

Tal e como lembra a Federación Galega de Institución para a síndrome de Down, a Consellería de Educación recortou esta axuda eliminando o material escolar, os caderniños de exercicios obrigatorios e os caderniños de material adaptado, que "son precisamente os recursos que utilizan os alumnos e alumnas con dificultades cognitivas". As mesmas críticas xorden da asociación Por Dereito (para a integración das persoas con autismo) ou dos colectivos de pais de nenos con necesidades educativas especiais, que sofren o mesmo problema.

A Xunta defende que debe foemntar o préstamo ou uso de materiais reutilizables e lembra que nos centros de educación especial hai subvencións directas ás familias

A Xunta deféndese asegurando que o que fai é fomentar o préstamo ou uso de materiais reutilizables e que esa é a razón de que só se subvencione a compra de libros que poidan acabar formando parte dun banco de préstamo. Os pais dos nenos con necesidades educativas especiais reivindican o dereito a recibir as axudas e a que os seus fillos acudan en igualdade de condicións aos centros educativos. Porque a Consellería de Educación advirte de que estes cativos con necesidade especial poden empregar libros de cursos anteriores no caso de estar integrados en primaria e secundaria, pero aclara que de estar en centros de educación especial, recibirían unha subvención directa de 250 euros e sen condicións.

Os pais afectados cren que o PP aproveita a lei Wert para fomentar a "segregación" dos seus fillos en centros especiais

E aí salta a alarma dos pais, que cren que o problema da Xunta non é económico, senón ideolóxico. Denuncian que a intención é, ao abeiro da nova lei Wert, "segregar" estes nenos, forzando as familias a que accedan a matriculalos en centros de educación especial. Así llelo manifestaron as familias afectadas á oposición parlamentaria (PSdeG, AGE e BNG), que coincidiron en levar esta problemática ao Parlamento.

As familias afectadas denuncian o intento de "segregar" e "excluír" por parte do Goberno do PP, que estaría empregando esta nova normativa de axudas para fomentar a entrada de nenos con necesidades especiais en centros illados e propios, sen posibilidade de mesturarse co resto da sociedade en calquera colexio público. O seguinte paso das asociacións, ante as reticencias dos populares a escoitar as súas reivindicacións, será presentar unha denuncia conxunto no Valedor do Pobo, convencidos como están da discriminación que supón este cambio normativo nas subvencións.