O proxecto de banca ética, cooperativa e cidadá FIARE celebra este sábado en Rivas Vaciamadrid a súa asemblea anual, onde os seus socios ratificarán o proceso de integración coa súa homóloga Banca Popolare Etica e aprobarán o inicio da actividade bancaria, que nos primeiros meses operará para os seus socios. Posteriormente, Banca Popolare Etica ratificará a integración nunha asemblea que terá lugar en maio en Florencia. Ao longo do ano as operacións abriranse a todas as persoas e a finais de ano FIARE terá un funcionamento normal como banca ética, cando menos como banco online ou no que se refire á apertura de contas e depósitos ou á expedición de tarxetas de crédito.
A finais de ano FIARE terá un funcionamento normal como banca ética, cando menos como banco online ou no que se refire á apertura de contas e depósitos ou á expedición de tarxetas de crédito
O outro obxectivo para este 2013 é contratar máis persoal para ampliar os servizos que prestará FIARE. Na actualidade traballan en FIARE en toda España unhas oito persoas, que se poderían duplicar a finais de ano. Neste momento, por exemplo, en Galicia non hai ningunha persoa contratada, polo que para prestar os servizos que a cooperativa ofrece actualmente se teñen que enviar informes a Euskadi para que fagan a avaliación social dos proxectos. É por iso que polo de agora a meirande parte dos proxectos financiados proceden de Euskadi, Navarra, Catalunya ou Madrid.
FIARE é un organización de banca ética con 3.886 persoas socias e máis de 4 millóns de euros en capital social. A pesar da crise económica a FIARE danlle as contas e ano a ano vai acadando e mesmo superando a súas espectativas de depósitos e balance. A día de hoxe financiou proxectos en todo o Estado por valor de 31 millóns de euros, e o aforro de persoas e organizacións ascende até os 33 millóns de euros. "Se nos comparamos coa banda normal esta cantidade non significa nada pero xa empeza a ser significativo", di Gonzalo Gesto (Fiare-Galiza).
A diferenza doutras entidades como Triodos Bank, Fiare ou Banca Popolare son cooperativas nas que as persoas que achegan o capital social pasan a ser socias de pleno dereito. Nas asembleas da entidade decídense desde as escalas salariais das persoas liberadas ou a taxa de xuro dentro do marco establecido polo Banco de España. Até o de agora a cooperativa actúa como intermediaria entre os solicitantes de crédito e a propia operativa bancaria, que conta con tres oficinas no Estado.
A partir de agora Fiare ofrecerá os mesmos servizos que calquera banco, aínda que cunhas diferenzas moi claras en canto ao carácter ético dos seus investimentos e créditos concedidos -destinados a cooperativas e á economía social-, á súa transparencia e ao seu non ánimo de lucro. Dende 2006 Fiare canalizou en España o aforro -até 33 millóns de euros- de persoas e organizacións "que queren facer un uso consciente dos seus cartos". Os seus principais ámbitos de actuación son proxectos vinculados á transformación no campo dos valores e a educación, a inserción social e laboral das persoas, a agroecoloxía e o comercio xusto e a cooperación norte-sur.
Segundo Raúl Asegurado, activista de Fiare, "para a banca ética é fundamental a creación de grupos locais, o asentamento no territorio e a sensibilidade cara as diferencias culturais e sociais". Agora Fiare deberá conxugar tamén o funcionamento como entidade bancaria co mantemento destas outras actividades que viña desenvolvendo como movemento social (pedagóxicas, parabancarias, de denuncia…). Para iso crearase unha segunda forma xurídica distinta da cooperativa..
