Incendios en Muíños, en Cervantes, en Lalín, en Manzaneda, en Mazaricos, en Pol ou en Antas de Ulla. Algúns moi importantes, coma o que queimou máis de 300 hectáreas na Serra do Xurés, e moitos outros máis pequenos, dos que a Xunta non ofrece información, ao ser inferiores ás vinte hectáreas. Demasiado lume para decembro. Veciños e os propios sindicatos que representan os traballadores das brigadas denuncian que os equipos de extinción chegaron moi tarde en case todos os casos, e con moi poucos efectivos, e en xeral critícase a "desorganización" e "improvisación" do dispositivo.
No Xurés, por exemplo as dúas brigadas que foron enviadas a apagar o lume contaban unicamente con dúas persoas cada un, ademais dunha motobomba que non funcionaba. CC.OO. acusa a Consellaría de Medio Rural de "irresponsabilidade" e de ter "case desmantelado o Servizo Público de Prevención e Defensa Contra Incendios Forestais. Afirman que "a día de hoxe, non dispón de casi ningunha brigada fixa completa; o máis habitual é que entren a traballar as brigadas con únicamente 2 ou 3 compoñentes" e lemban que o sindicato xa denunciou hai semanas "a temeridade de Medio Rural por envíar ao desemprego a 610 traballadores fixo/discontínuos o pasado 30 de novermbro, en plena vaga de lumes de outono favorecidos pola seca e polas fortes xeadas que converten o matorral en isca incendiaria nos nosos montes".
"Virán as augas e calmará todo, pero se non hai persoal para facer prevención, cando chegue a primavera e o verán volverá haber lumes graves, moito máis graves do que deberían ser"
CCOO denuncia así mesmo que a Consellería ten previsto despedir a máis traballadores o 31 de decembro e ínstaa "a que proceda a cubrir as vacantes que hai nas brigadas e que non sigan deixando unha e outra vez todo á improvisación". Neste senso, Óscar Rodríguez, delegado do sindicato no servizo, denuncia que "están liquidando o servizo de extinción e prevención, porque as brigadas tamén fan prevención, ou deberían facela" e sinala que "non é normal que os incendios acaden as dimensións que están tendo estes días". Conclúe que "virán as augas e calmará todo, pero se non hai persoal para facer prevención, cando chegue a primavera e o verán volverá haber lumes graves, moito máis graves do que deberían ser".
Incendio na Serra do Candán
Tamén se rexistrou un incendio a noite deste mércores en Lalín, na parroquia de Vilatuxe, nunha zona da Serra do Candán incluída na Rede Natura. O lume quiemou arredor de 30 hectáreas e iniciouse ás once da noite. Porén, non foi até as dez da mañá deste xoves cando se achegaron ao lugar os primeiros medios de extinción da Xunta, procedentes de Moraña. O monte estivo ardendo toda a noite sen control e algúns veciños achegáronse até o lugar para tentar afastar o lume dos seus terreos.
Nicolás González, secretario xeral do PSdeG-PSOE en Lalín e secretario de Medio Rural e Medio Ambiente do seu partido na Provincia de Pontevedra, denuncia que nos últimos anos, e neste mesmo 2013, houbo varios incendios no mesmo lugar; por exemplo, o ano pasado arderon 200 hectáreas, este ano outras cen, e todas ao redor da parroquia de Vilatuxe. González sinala que "é evidente que aí pasa algo, hai alguén que quere queimar esa zona e o Concello de Lalín non fai nada por este problema, saben que arde e non fan nada". Engade que se trata dunha zona "de moito valor para o Concello de Lalín, tanto a nivel forestal, como polo seu potencial turístico".