O INE publicou este mércores os datos da Estatística do Padrón de Residentes no Estranxeiro, un total de 2.183.043, dos que case unha cuarta parte son galegos e galegas (493.970). O número de galegos e galegas que viven de forma estable fóra de España non deixa de crecer e incrementouse en case 110 mil dende o ano 2009, un 29%.

Esta cifra acolle todo tipo de circunstancias, dende persoas que emigraron hai varias décadas, os seus descendentes, novos emigrantes que marcharon do país nos últimos anos ou persoas nacionalizadas recentemente, por exemplo a través da extensión da nacionalidade española derivada da Lei da Memoria Histórica. Este incremento deixouse ver xa no aumento do Censo de Residentes Ausentes (CERA), que se incrementou en 100 mil persoas dende o 2008. Dese total de 493.970 galegas e galegos que viven no estranxeiro, algo máis de 158.000 mil naceron en España.

Arxentina (168.263), Venezuela (46.882), Brasil (46.217), Uruguai (40.505), Suíza (39.567), Cuba (36.414), Francia (18.649), Estados Unidos (17.678), Alemaña (16.485), Reino Unido (12.882), México (12.445) acollen os maiores continxentes. Chile (3.907), Portugal (3.863), Panamá (3.477), Países Baixos (2.976), Bélxica (2.812), Andorra (2.398), República Dominicana (2.345) ou Canadá (2.173) teñen tamén importantes comunidades galegas, que se distribúen por case todo o planeta. Máis de sesenta países contan con 24 galegos ou máis entre os seus habitantes, que suman un total de 1.748 en Oceanía, 1.087 en Asia ou 951 en África.

Galegos residentes no estranxeiro. Fonte: INE