Despece

• "O que non se podía pensar é que nacese o 15M e cambiásemos o mundo, isto é un proceso moi longo"

  A manifestación na Coruña partirá ás cinco e media da tarde dende a Praza da Palloza, dende onde se dirixirá até o Obelisco e a Praza de María Pita. Pero as actividades non finalizarán coa lectura dos manifestos e discursos diante do Concello. Entre o domingo 13 e o martes 15 (cando se cumprirá exactamente un ano dende as primeiras manifestacións do movemento), haberá obradoiros, accións e asembleas temáticas organizadas por diferentes asociacións e colectivos da cidade, baixo o título de Hai alternativas, construímolas todos nós.  E está convocada tamén unha folga de consumo. Reactivarase deste xeito a praza, neste caso o Obelisco, onde o martes ás oito da tarde celebrarase unha asemblea temática centrada en Como respostar ós ataques do goberno e do poder financeiro.

  Iván, activista do movemento 15M na cidade, salienta que nos últimos meses se veu realizando un traballo menos visible e máis disperso, centrado en loitas concretas, coma a reivindicación dunha banca pública galega, a batalla contra os desafiuzamentos, a reivindicación da Democracia 4.0 ou procesos de máis longo percorrido, coma Rurales enREDadxs, "xente que está volvendo ás zonas rurais, para montar alí cooperativas de autoconsumo". Iván afirma que o 15M "conseguiu cambiar os hábitos de consumo, ou por exemplo tivo impacto no crecemento da banca ética ou de Tríodos. O que non se podía pensar é que nacese o 15M e cambiásemos o mundo, isto é un proceso moi longo".

  En canto a esta cooperación entre o 15M e outros colectivos, Iván di que “o problema que temos aquí é que non nos coñecemos”, aínda que destaca que “eles saben que cando necesitan de nós, poden contar con nós, e cando nós necesitamos deles, podemos contar con eles”. Con todo, conclúe que “creo que tampouco sería bo que nos confundísemos uns con outros, porque os movementos sociais teñen a súa identidade e a súa función”.

  "A asociación vai durar seis meses, e DRY como colectivo durará seis meses tamén, e a xente migrará cara a outras cousas"

  Finalmente, no que respecta á polémica aberta nos últimos días no seo de Democracia Real, pola decisión dun grupo de activistas de constituírse en asociación, Iván cre que “a asociación é algo complementario a DRY; como asociación podes facer unha serie de cousas que non podes facer como colectivo" e conclúe que "a asociación vai durar seis meses, e DRY como colectivo durará seis meses tamén, e a xente migrará cara a outras cousas. Cada un vaise situando naquelas funcións ou actividades que máis lle interesan”.

  

• "Tentamos unir todos os colectivos de Vigo, sen ser pretenciosos, para traballar todos xuntos"

  En Vigo a manifestación partirá da Praza de España ás sete da tarde, percorrendo as rúas do centro (Gran Vía e Urzáiz) ata a Praza da Estrela, onde se leerá un manifesto global. A marcha está convocada polo 15M de Vigo, Democracia Real Xa Vigo, xunto coa plataforma ECOAR, que conforman distintos colectivos sociais e veciñais, entre eles Attac Xustiza Global. O manifesto da marcha critica que "os gobernos reveláronse como instrumentos do que chaman “os mercados”, que en realidade son grandes empresas transnacionais e financeiras con nome e apelidos" e denuncia "o engano que fan sobre a cidadanía, presentando como única saída posible da crise os recortes sociais, a través da perda de dereitos e liberdades" reivindicando que "persoas e colectivos ao longo de todo o mundo demostran que hai alternativas para saír da crise e que outros camiños son posibles e necesarios".

  Nos últimos días houbo unha certa polémica, despois de que CCOO, UXT e CIG anunciasen a convocatoria dunha manifestación en defensa do sector naval da cidade o mesmo sábado pola tarde

  Nos últimos días houbo unha certa polémica, despois de que CCOO, UXT e CIG anunciasen a convocatoria dunha manifestación en defensa do sector naval da cidade o mesmo sábado pola tarde, cando a mobilización global do 12M había meses que estaba convocada. O 15M de Vigo publicou unha nota de prensa na que convidaba a sindicatores e traballadores do naval a unírense na mobilización, pois "os traballadores do sector naval sofren os mesmos problemas que o 99 por cento da poboación: recortes en sanidade e educación, degradamento dos servizos públicos en xeral, paro, malas condicións de traballo, etc.". De momento, a CUT anunciou que o sábado participará na manifestación convocada polo 15M.

  Rosalía, activista do 15M de Vigo, ennumera algunhas das accións que o movemento está levando a cabo neste momento, comenzando polo apoio aos estudantes pechados en Torrecedeira, a colaboración coa plataforma de afectados polas hipotecas e coa Plataforma polo aforro público, así como o traballo conxunto cos afectados polas participacións preferentes de Caixanova na cidade. Así mesmo, levan meses recollendo sinaturas para enviar unha petición ás Cortes, cun programa de reformas, por considerar que se trata dunha vía máis efectiva que unha ILP.

  Nas vindeiras semanas o 15M volverá facer asembleas na Farola, para volver conectar directamente coa cidadanía

  Nas vindeiras semanas o 15M volverá facer asembleas na Farola, para volver conectar directamente coa cidadanía, "tentando unir todos os colectivos de Vigo, sen ser pretenciosos, para traballar todos xuntos naquelas cousas que temos en común, que son moitas", indica Rosalía

  

• "O máis interesante son as relacións que se están creando con outros colectivos"

  En Compostela a manifestación partirá ás seis da tarde da Alameda. Sera a culminación de semanas de traballo, debates e difusión realizadas pola Acampada Obradoiro, que hai uns días pedía a participación de todos os colectivos sociais da cidade na marcha, nunha convocatoria aberta, á que se uniron, por exemplo, o Foro Galego de Inmigración, a Asamblea Aberta e a Asamblea de Traballadores. Houbo unha intensa campaña no twitter, xuntanzas con asociacións de veciños e mesmo un concerto para recadar fondos para a manifestación. Así mesmo, o 15M apoiará a folga estudantil convocada para este xoves, participando na manifestación convocada para as 12 do mediodía na Praza do Toural.

  O 15M apoiará a folga estudantil convocada para este xoves, participando na manifestación convocada para as 12 do mediodía na Praza do Toural

  Segundo Cristina, activista do 15M en Compostela, "non temos a visibilidade que tiñamos hai meses, pero estamos a realizar moitas accións en cooperación con outros grupos, tanto en cuestión de aforro público, folga do ensino ou desafiuzamentos. O máis interesante son as relacións que se están creando con outros colectivos. Santiago é un lugar moi difícil de sachar nese sentido, porque hai moitos colectivos que levan anos traballando e nós acabamos de chegar, aínda que teñamos xa un ano". E conclúe: "É un traballo máis invisible, pero é moi importantes de cara ao futuro"

   

  

• "Hai xente que se desanimou e outros en cambio co paso do tempo foron mirando con máis simpatía o movemento"

  En Pontevedra a manifestación sairá ás seis e media da tarde dende a Alameda. Será unha fin de semana inzada de actividades na cidade, que chegarán até o martes 15, no que se conmemorará o aniversario das primeiras manifestacións. Dende o mediodía do día 12 haberá na Praza de España da cidade mesas informativas instaladas por distintos colectivos sociais da comarca. Unha vez que conclúa a marcha, que camiñará baixo o lema Non somos mercadoría en mans de políticos e banqueiros, haberá senllas charlas informativas a cargo de representantes de Agareso e Amarante. A seguir, micrófono aberto para os e as asistentes, para concluír cunha serie de concertos, nos que destaca a actuación de Projecto Trepia. 

  Será unha fin de semana inzada de actividades na cidade, que chegarán até o martes 15, no que se conmemorará o aniversario das primeiras manifestacións

  As actividades continuarán até o día 15, cando está convocada unha concentración na Praza de España, a partir das oito e media da tarde. Sabela, activista do movemento na cidade, reflexiona sobre os 12 meses de traballo do 15M e di que "hai xente que se desanimou, porque pensaban que se ían conseguir máis cousas, e outros en cambio, que nos vían con desconfianza, que nos chamaban perroflautas, co paso do tempo foi mirando con máis simpatía o movemento". Salienta, principalmente, o traballo realizado en colaboración con outros colectivos, coma a campaña contra o reformazo da Constitución, ao que contestaron con cazoladas nas rúas ou a participación na Plataforma pola sanidade pública. “A vía é colaborar cos colectivos que xa están traballando en cada ámbito”, conclúe.

  

• "Nestes últimos meses moita xente buscou lugares de loita específicos"

  Na cidade das Burgas a convocatoria é ás sete da tarde na Alameda e a manifestación percorrerá a rúa Progreso, Xoán XXIII, Bedoya, Rúa do Paseo e rematará na Praza Maior. Alí lerase un manifesto de Asamblea Aberta Ourense e outro de Estudantes sen Futuro, e ao remate haberá actuacións musicais. Nos días seguintes, até o martes 15, haberá asembleas abertas nas prazas da cidade.

  O manifestos inclúe cinco reivindicacións, nas que se basea a convocatoria da manifestacións: "Nin un euro para rescatar os bancos; Educación e sanidade públicas, gratuitas e de calidade; Reparto do traballo e retrirada da reforma laboral; Dereito garantido de acceso á vivenda digna e dación en pagamento retroactiva; e Reforma tributaria que permita distribuir de forma xusta a riqueza e Renda basica univerasl para todos e todas as cidadás e cidadáns".

  Roberto, membro da Asemblea Aberta, afirma que "tendo en conta o que está a caer, esperamos unha boa resposta na manifestación do sábado"

  Roberto, membro da Asemblea Aberta, afirma que "tendo en conta o que está a caer, esperamos unha boa resposta na manifestación do sábado". Salienta que despois dos primeiros meses de participación masiva nas prazas, "nestes últimos meses a xente buscou lugares de loita específicos", pero pon en valor a asemblea como método de traballo, espazo de encontro e lugar de toma de decisións colectivas: "A asamblea era algo magnífico, era o pobo na rúa que podía chegar a empoderarse. Son espazos completamente abertos, aos que pode acudir calquera persoa, coa ideoloxía que teña".

  

• “Aínda hai moita xente que non se decata do que está pasando”

  En Lugo a manifestación comezará ás seis e media da tarde na Praza Maior, aínda que haberá unha presenza continua na praza dende as once da mañá, con actividades reivindicativas desenvolvidas por distintos colectivos e movementos sociais da cidade, así coma teatro e presentación do Anuario do Movemento 15M Lugo, que recolle parte dos contidos publicados na súa revista, que se edita cada mes. 

  Vanesa, activista do movemento, afirma que os motivos para saír á rúa a manifestarse “aínda son máis grandes” que o ano pasado

  Vanesa, activista do movemento, afirma que os motivos para saír á rúa a manifestarse “aínda son máis grandes” que o ano pasado. É por isto que sitúa como grandes retos do movemento 15M na cidade nos vindeiros meses "informar e mobilizar" pois “aínda hai moita xente que non se decata do que está pasando”. Entre as actividades realizadas no último ano, Vanesa salienta a convocatoria de charlas e debates sobre sanidade e educación, apoio a todas as manifestacións que se levaron a cabo na cidade, dentro dun bloque crítico, a edición da revista mensual, a creación dun mercado de troco, as mobilizacións en prol dunha banca pública, en solidariedade cos afectados polas preferentes ou as concentracións convocadas en apoio dos estudantes de Valencia.

  En Chantada está prevista unha concentración ás sete da tarde na praza do Cantón. Antes, ao longo do día, celebraranse outras actividades, que comezarán cun xantar popular na zona do Muíño-Alameda a partir da unha e media do mediodía.