O colectivo de mestres e mestras colaboradoras da Secretaría Xeral de Política Lingüística para impartir os cursos de galego para adultos (Celga e linguaxe administrativa e xurídica), ao redor de 500 persoas, difunde no seu blog un manifesto denuncia a súa "precaria situación". O texto demanda cambios na maneira de xestionar o sistema de formación en lingua galega para adultos e alerta de que a Xunta pretende "ir eliminando os cursos que impartimos para usar como man de obra máis barata aínda o profesorado das escolas de idiomas e o persoal técnico de normalización lingüística dos concellos".

O manifesto pide "a creación dun grupo estable de profesorado profesionalizado, seleccionado e contratado a través dun proceso selectivo público de acordo cos principios de igualdade, mérito, capacidade e publicidade"

O manifesto pide "a creación dun grupo estable de profesorado profesionalizado, seleccionado e contratado a través dun proceso selectivo público de acordo cos principios de igualdade, mérito, capacidade e publicidade". Mentres non se cree ese corpo de profesorado estable, demandan melloras relativas á "clarificación e mellora dos requisitos para acceder á listaxe de profesorado colaborador", á "contratación formal do profesorado colaborador, con todo o que isto supón: o establecemento dunhas condicións laborais xustas e pactadas entre Administración e persoas traballadoras" e a "convocatoria anual de cursos de formación para profesor@s e avaliador@s".

Afirman que "despois de observar que na última convocatoria de cursos Celga se seguen a cometer os mesmos ou aínda peores erros que en convocatorias anteriores", algunhas das persoas que forman parte da listaxe de profesorado colaborador "decidimos xuntarnos e organizarnos para desenvolver accións que mostren a nosa desconformidade cos abusos que a Administración está a cometer co noso colectivo". Din estar fartos e fartas "de que a Secretaría (goberne quen a goberne) se aproveite da precariedade laboral que existe no ámbito da docencia en galego para contar todos os anos cunha listaxe de profesorado colaborador que fica exento de dereitos laborais: sen contrato; sen posibilidade de negociar unhas retribucións que minguan ano tras ano; sen termos a seguridade de se un ano imos traballar ou non; sen saber cando imos traballar e cando imos cobrar".

Tamén critican que "cada ano cambien os procedementos para acceder á listaxe de profesorado", de "ter só obrigas e de non ter ningún dereito" e as "prácticas escurantistas"

Tamén critican que "cada ano cambien os procedementos para acceder á listaxe de profesorado", de "ter só obrigas e de non ter ningún dereito" e as "prácticas escurantistas", pois as "listaxes de chamamentos seguen sen ser públicas, polo que as persoas que formamos parte delas non sabemos cando realmente nos vai tocar dar un curso".