O Concello de Vigo reiniciou na noite deste domingo ao luns as obras na rotonda de Coia. A construtora contratada pola administración local comezou de novo os polémicos traballos para colocar o barco de Alfageme sobre a medianoite e por sorpresa, cando comezou a desprazar maquinaria ata a zona. Uns vinte veciños saíron das súas casas para concentrarse ante uns labores que estaban protexidos por varias patrullas da policía local.
Dúas escavadoras, catro camións e varios operarios reiniciaron os traballos sobre as 12 da noite
Segundo a Asemblea Aberta de Coia, dúas escavadoras e catro camións, xunto a diferentes operarios, desprazáronse á zona de noite e reanudaron uns traballos acompañados dun importante dispositivo policial. O Concello teima así nunhas obras que están sendo fortemente rexeitadas polos veciños, que o pasado sábado celebraron unha nova xuntanza e ofreceron unha rolda de prensa e que este mesmo luns volven estar convocados para as sete da tarde.
A asemblea aberta do barrio denunciou este sábado a actuación do Concello e negou calquera agresión á policía local, tal e como se lle atribúe a varios persoas, logo de que o goberno municipal denunciase tamén ante a Fiscalía e a Subdelegación do Goberno 25 dos 40 veciños identificados durante este mes no que saíron en varias ocasións á rúa para portestar contra as obras. “A policía local ten ordes expresar do Concello para criminalizar a protesta”, advertiu Esther Lora, veciña do barrio e avogada dos dous detidos da pasada semana e ás que se uniu un novo arrestado ao que acusan, como aos outros, de atentado contra a autoridade e lesións.
Tres veciños foron xa detidos e 25 denunciados ante a Fiscalía polas protestas contra as obras na rotonda de Coia
En definitiva, foron xa tres as persoas detidas e 25 as denunciadas polas protestas da rotonda, mentres que a Fiscalía aceptou a trámite unha querela presentada polos veciños de Coia pola tramitación administrativa do proxecto. Abríronse así dilixencias de investigación penal por posibles delitos de prevaricación, suborno, tráfico de influencias e malversación de fondos públicos tras a denuncia interposta pola Asemblea Aberta do barrio vigués.
O Concello, non obstante, insiste en que non vai tolerar o que considera actos vandálicos e insiste nunhas obras rodeadas de polémica e rexeitamento social. Os veciños e veciñas de Coia levan semanas impedindo o inicio dos labores na rotonda da avenida Castelao, unha actuación baseada na instalación alí do barco Bernardo Alfageme, propiedade do Concello, e criticada polo seu elevado custo. Ademais, o pleno municipal -cos votos de PP e BNG- votou en contra das obras o pasado 22 de decembro (como xa fixera hai dous meses).
A cidadanía critica o elevado custo da obra (de cando menos 100.000 euros, como recoñece o goberno local), que se sumarían a outros gastos xerados por este barco, que dende que foi adquirido polo Concello acumula un desbaldimento de cartos públicos de case un millón de euros. Lembran en en todo o concello hai 32.000 persoas desempregadas. Propoñen tamén localizacións alternativas para a instalación deste barco, como por exemplo o Museo do Mar de Galicia, situado na cidade, unha proposta que foi aprobada pola maioría do pleno municipal, ou tamén na finca Zulueta, próxima ao museo.
