A dirección do PSOE conxúrase para evitar o debate do liderado

Pachi Vázquez, xunto a Elena Valenciano nun mitin © PSdeG

A dirección do PSOE decidiu pór freo a calquera debate sobre o liderado de Rubalcaba logo das derrotas electorais en Galicia e no País Vasco. "Non é o momento de abandonar as responsabilidades -dixo o número dous do partido, Elena Valenciano- senón de asumilas con máis forza". Valenciano sinalou que o congreso do PSOE lles deu "un mandato e unha tarefa", en referencia á elección de Rubalcaba como líder do partido. Sobre a posibilidade dunha dimisión do seu líder, Valenciano resolveu cun "non se expuxo a dimisión de Rubalcaba".

Valenciano asegura que non se pensa na dimisión de Rubalcaba

O calendario dos socialistas acelérase a partir de agora e como prioridade exponse a celebración dunha gran Conferencia Política para principios de 2013. Ante as críticas internas, Valenciano advirte que a partir de agora "non se trata de cegar. Trátase de convencer, aínda que isto leve máis tempo e trátase de avanzar, non de buscar atallos".

Segundo Valenciano, "o resultado destas eleccións dinos que temos que seguir coa tarefa de oposición a unha política que é moi mala para España e que á vez temos que acelerar a presentación de propostas alternativas que fagan ver aos cidadáns que hai outra solución".

O PSOE cre que a perda de votos aínda  pode ir a peor nas próximas citas electorais

A dirección socialista é pesimista coas súas opcións electorais a día de hoxe. Segundo Valenciano, o ciclo electoral negativo para o PSOE "aínda non terminou". "Somos conscientes que estamos obrigados a volver merecer a confianza dos cidadáns que seguramente decepcionamos".

Preguntada sobre as declaracións de López Aguilar no sentido de que este é o peor momento da historia do PSOE, Valenciano sinala que "non sei se é o peor, pero desde logo é malísimo. Juan Fernando ten razón". Á pregunta de se os socialistas meditan impulsar un proceso de primarias para aclarar xa quen será o seu candidato ás próximas xerais, Valenciano respondeu que "quen vai ser o candidato non é agora o debate".

Pachi Vázquez, xunto a Elena Valenciano nun mitin © PSdeG

Despece

  • "É a peor situación do PSOE en 35 anos"

    O eurodeputado socialista Juan Fernando López Aguilar dixo este luns que o PSOE atravesa unha situación "moi grave, a peor en 35 anos" e considerou que chegou o momento de "arranxalo", pero sen facer xiros dramáticos" nin con "titulares impactantes" nin cun "socialismo de twitter".

    López Aguilar fixo estas declaracións aos xornalistas á súa chegada á sede do PSOE para participar na Comisión Permanente da Executiva Federal, na que a dirección analiza os malos resultados das eleccións galegas e vascas, que empezaron a alimentar o debate sobre o liderado de Alfredo Pérez Rubalcaba.

    "Os españois non recoñecen xa o PSOE como a súa alternativa"

    "Non nos van a reprochar que fagamos autocrítica, que dediquemos un tempo á nosa capacidade de ser útiles", afirmou o dirixente socialista, quen opinou que "os españois non recoñecen xa o PSOE como a súa alternativa, como a súa ferramenta para cambiar esa política" da dereita que "é hexemónica en Europa".

    "Temos que recuperar o prestixio de militar no PSE e traer os mellores"

    "Isto témolo que arranxar os socialistas", dixo, antes de sinalar: "Eu amo o PSOE e polo tanto voume a deixar a pel en contribuír á recuperación do partido". Ao seu xuízo, hai que "mobilizar" os mellores recursos e as mellores enerxías para "recuperar o prestixio de militar no PSOE". "Temos que traer aos mellores", engadiu.

    Neste sentido e preguntado polas voces que piden a dimisión de Rubalcaba como secretario xeral, afirmou que "non é a idea". "Non consiste en facer xiros dramáticos. Avogo pola luz longa, polo medio e o longo prazo. Non é o momento de titulares impactantes, nin de socialismo de twitter", agregou.

  • Pide que se fagan "cambios profundos e serios"

    "Hoxe é momento de solidariedade, mañá será momento de reflexións profundas e serias porque haberá que facer cambios profundos e serios no PSOE", indicou o secretario dos socialistas madrileños nunha visita a Batres, onde non se referiu en ningún momento concreto ao secretario xeral, Alfredo Pérez Rubalcaba.

    "Hoxe é día de solidariedade; mañá será momento de reflexións profundas e serias"

    Preguntado pola súa opinión sobre os resultados, Gómez sinalou que o que "hoxe toca" é "mostrar" a súa "solidariedade e efecto" aos seus "compañeiros socialistas", que fixeron unha "campaña moi dura" e que hoxe están a vivir un "día duro porque onte o PSOE non obtivo un bo resultado electoral".

    Ante a insistencia das preguntas sobre se debe haber cambios no partido, Gómez reiterou que a "reflexión" ten que facerse a partir de mañá e que el non vai adiantar nada porque se non, esta reflexión, que hai que facela no ámbito do PSOE, non sería "profunda". "Se hoxe empeza a debullar ideas e puntos de vista non será tan serio nin profundo", apuntou.

    Logo de destacar que a derrota de onte en ambas as dúas comunidades foi "contundente" para o PSOE, Gómez indicou que o que se puxo de manifesto este domingo é que "cando á xente" á que "representa" o PSOE "vaille mal tamén lle está indo mal ao Partido Socialista". "En realidade, a historia do partido é sempre así, cando a España lle ha ir mal tamén ao PSOE", resaltou.

  • "En Galicia gobernamos con independentistas; ruboriza que o PSOE use a expresión 'español' nas siglas"

    O ex presidente do Congreso José Bono valorou para eldiario.es a contundente derrota electoral sufrida polo seu partido en Galicia e Euskadi. Segundo Bono, "o PSOE esvaeceu tanto a súa mensaxe e a súa imaxe de partido nacional que ruboriza utilizar a expresión español nas súas siglas". Todo iso, segundo Bono, "fíxonos pagar unha dura peaxe".

    "En Cataluña e Galicia gobernamos con independentistas, en Andalucía con comunistas, no País Vasco coa dereita. Nese pucheiro hai alimentos incompatibles"

    O veterano político é moi crítico coa deriva socialista nas comunidades autónomas e afirma que "en Cataluña e Galicia gobernamos con independentistas, en Andalucía con comunistas, no País Vasco coa dereita. Nese pucheiro hai alimentos incompatibles. O guiso non pode ser apetitoso". Así as cousas, Bono pregúntase "como manter a imaxe nacional do partido que fundou Pablo Iglesias?".

    Preguntado sobre a cuestión do liderado á fronte do PSOE Bono ironiza: "Bastantes problemas ten a dirección do partido para que eu remova as augas". Segundo el, "a Rubalcaba correspóndelle administrar eses tempos".

    Segundo Bono a actual situación do PSOE non é comparable coa desintegración que no seu día reduciu a UCD á nada pero advirte que "sería temerario pensar que o noso chan está garantido".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza