Os e as militantes de ANOVA decidirán nun referendo o modelo de coalición e o programa político para as eleccións europeas do vindeiro ano, segundo decidiu este sábado a Coordinadora Nacional da formación.
Antes, iniciarase un proceso asembleario, a nivel comarcal, para comezar a debullar este asunto, até chegar a unha Conferencia Política, que se celebrará previsiblemente en xaneiro, e na que se debaterán as distintas propostas. O proceso rematará cun referendo no que a militancia tomará a decisión final votando nas súas localidades e comarcas.
As asembleas comarcais recibirán "unha información completa e actualizada" sobre os contactos que Anova está a manter con distintas forzas políticas, buscando a conformación, segundo está recollido nos documentos da formación, dunha "fronte ampla non excluínte".
