O PSdeG-PSOE pechou este sábado o seu congreso provincial en Lugo, no que saíu elixida unha nova Executiva, Patricia Otero como nova secretaria xeral e José Tomé como presidente. O congreso extraordinario foi clausurado por Gonzalo Caballero, secretario xeral do PSdeG-PSOE, que fixo votos por desbloquear a situación política que impediu pechar un acordo para investir a Pedro Sánchez como presidente do Goberno.
Caballero salientou o “esforzo” do PSOE ao “abrir as portas á formación dun goberno de coalición por primeira vez na historia democrática de España”, e pediu “responsabilidade” a todas as forzas de esquerda, lembrando que as tres dereitas “van seguir na loita”.
O líder dos socialistas galegos dirixiuse tamén a Alberto Núñez Feijóo, ao que cualificou de "camaleón político" por "falar agora de absterse" na investidura de Sánchez "á vez que aplaude os pactos PP-Vox en Murcia ou Andalucía". Caballero retou a Feijóo a “dar instrucións aos seus deputados para que deixen a súa campaña de ataque a Pedro Sánchez” e así posibilitar a conformación "do único goberno de España viable".
Caballero chamou a "traballar arreo" nos próximos meses, de cara ás eleccións autonómicas, para deseñar políticas que "permitan un cambio político"
O secretario xeral do PSdeG chamou a "traballar arreo" nos próximos meses, de cara ás eleccións autonómicas, para deseñar políticas que "permitan un cambio político" que dea “máis futuro” a Galicia e liberen á Xunta do “couto privado no que a quere converter Feijóo".
Pola súa banda, Patricia Otero marcouse como “reto” conseguir que Gonzalo Caballero sexa “o vindeiro presidente da Xunta” e poñer fin así ao “fracaso” que a década de Feijóo á fronte da Xunta ten representado para Galicia e para Lugo, dixo. Otero fixo un chamamento á "unidade interna" e afirmou que "todos xuntos e todas xuntas temos que poñernos a remar no mesmo sentido para levar o barco ao mellor porto. Porque Lugo ten futuro”, concluíu a deputada burelense, utilizando así o lema do congreso.