A adopción do euro foi positiva para Galicia, NovaGaliciaBanco debería converterse nun banco de titularidade pública galega, É máis importante o crecemento económico do país que a protección do medioambiente, O actual momento de crise económica esixe priorizar a defensa dos dereitos sociais sobre os dereitos nacionais de Galicia, É necesaria unha reforma da lei electoral en España, Débense eliminar as subvencións aos sindicatos ou Debemos ter leis máis restrictivas respecto do aborto. Son algunhas das trinta preguntas a través das que a enquisa que propón Horizonte Galicia sitúa o votante en dous eixos: esquerda-dereita e centralismo-descentralización e en relación coas propostas de PP, PSdeG-PSOE, BNG, AGE, CxG e UPyD.
A enquisa está dirixida por Fernando Mendez e Javier Ramos-Diaz, do e-Democracy Centre da Universidade de Zúrich. E foi realizada por Rosa Maria Navarrete (Coordinadora principal, Universidad Autonoma de Madrid), Bruno Gonzalez (Universidad Pompeu Fabra), David Gulín Díaz (Universidade de Santiago) e Ruben González Gómez (Universidade de Santiago).
Ofrece resultados sobre o posicionamento do elector nos dous eixos referidos, sobre o seu propio autoposicionamento, e sobre a porcentaxe de coincidencia cos programa dos seis partidos. O enquisado pode sinalar posteriormente a que asuntos lles concede máis importancia para obter un resultado máis fiable e tamén comparar o seu posicionamento co de outros usuarios. Tamén se pode consultar a base de datos coas posicións dos partidos, a partir das que o estudo realiza os cálculos. Neste aspecto a aplicación presentaba nun comezo algúns erros que xa foron subsanados. Finalmente, pódese descargar un informe persoal e compartir os resultados nas redes sociais. Onde te sitúa a ti? Levaches algunha sorpresa?