Feijóo faise de rogar e insinúa que non vai facer público a que candidato apoia para presidir o PP

Feijóo na súa comparecencia deste xoves Dominio Público Xunta de Galicia

Na súa habitual estratexia de presentarse a si mesmo como gañador tras calquera tipo de loita política interna ou externa, o presidente da Xunta e do PP galego, Alberto Núñez Feijóo, leva toda a campaña pola presidencia estatal do partido evitando que as súas verbas o sitúen no bando perdedor. E así o seguiu a facer este xoves, a un día de que comece o congreso no que os compromisarios elixirán en urna entre Soraya Sáez de Santamaría e Pablo Casado. Por non posicionarse, Feijóo non foi quen de dicir este xoves nin se vai facer público ou non antes da votación a cal dos dous candidatos apoia, limitándose a insinuar que non o fará pero sen amosar ningún desgusto por ser o foco de atención de todo o seu partido ata o mesmo momento en que se pechen as urnas. “Non vou convocar ningún acto público” foi a súa declaración máis clara.

Detrás desa decisión de Feijóo de non verbalizar a súa preferencia persoal situaríase, segundo fontes do partido, a vaga de anuncios realizados na tarde deste mércores por numerosos cargos do PP galego. Varios deses dirixentes falaron con Feijóo e comunicáronlle as súas preferencias e, ante a postura críptica deste último sobre se faría ou non pública a súa elección, optaron por ilo facendo eles, provocando á súa vez posicionamentos doutros moitos cargos intermedios. A maioría, entre eles algúns dos máis próximos a Feijóo, como o vicepresidente da Xunta e presidente do PP de Pontevedra, Alfonso Rueda, o último dos máis relevantes en facelo este mesmo xoves, decantouse por Casado, como tamén fixeron o presidente do PP provincial da Coruña, Diego Calvo, ou a vicevoceira no Parlamento, Paula Prado.

O titular da Xunta defende a “liberdade” de “dicilo en público ou dicilo na urna” e abre as portas a aceptar que o gañador lle outorgue unha maior proxección estatal no partido

Pola contra, aínda que en menor número, outros destacados populares galegos optaron por Santamaría, como o presidente do PP ourensán, José Manuel Baltar; o presidente do Parlamento, Miguel Santalices, fiel ao baltarismo; ou a ex-presidenta desa mesma Cámara e deputada no Congreso Pilar Rojo, amiga persoal de Mariano Rajoy.

Feijóo, mentres, refúxiase no silencio, o que non lle impediu amosar xestos na primeira fase da campaña que o situaron máis próximo a Cospedal, gañadora no total de Galicia pero non en Ourense, onde xa gañara Santamaría. Posteriormente, tras quedar eliminada a ata o de agora secretaria xeral do PP, Feijóo pasou de ser partidario dunha candidatura de unidade previa ao congreso a defender a lexitimidade do que poidan decidir os compromisarios, o que, unido ao posicionamento público dos seus colaboradores máis próximos, contribúe a situar a Feijóo máis próximo a Casado que a Santamaría, malia que el non queira verbalizalo e correr así o risco de perder.

Feijóo di que son igual de respectables as posturas de dicir en público a quen apoia cada compromisario ou dicilo "na urna"

Este xoves a Feijóo, na súa rolda de prensa habitual tras a reunión semanal do seu Goberno, preguntóuselle de xeito reiterado se vai facer ou non pública a súa postura antes de que os compromisarios voten, pero en ningún momento respondeu unha cousa ou outra. Todo o máis que dixo foi que non pensaba convocar ningún acto público para dicilo, ou non dicilo, e asegurar que o proceso actual baséase na liberdade dos compromisarios e que “esa liberdade lévanos a dicilo en público ou na urna”. A el, di parécenlle igual de respectables as dúas posturas.

A Feijóo preguntóuselle tamén polos reiterados eloxios que recibe de Casado e respondeu que os agradece porque “non se debe ser desconsiderado cunha persoa que de xeito constante cre que o modelo do PP para toda España debe inspiralo o do PP de Galicia”. Nada se lle preguntou de xeito expreso sobre Santamaría, e nada dixo el sobre ela.

“Se podo colaborar en maiores horas de dedicación ao PP en España, irémolo vendo", di o presidente

Tamén se lle cuestionou sobre a posibilidade de que asuma responsabilidades no PP estatal, como lle ofrece Casado, ao que respondeu reiterando que rexeitou participar na actual campaña pola sucesión de Rajoy porque o seu compromiso está na Xunta. Pero deixou a porta aberta a aceptar esa maior proxección estatal que lle poida ofrecer quen gañe: “Se podo colaborar en maiores horas de dedicación ao PP en España, irémolo vendo, pero iso non pode tocar nin un minuto da axenda da Xunta”.

Feijóo, con Pablo Casado nun acto da campaña interna do PP Dominio Público Imaxe difundida pola candidatura de Casado
Sáenz de Santamaría e Feijóo no día de campaña que a primeira fixo en Galicia Dominio Público @Sorayapp

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.