O BNG aborda o seu debate decisivo

Votación na Asemblea Nacional do BNG de 2013 CC-BY-SA BNG

O BNG xunta este sábado o seu Consello Nacional para debater os relatorios nos que se baseará o proceso que culminará, o vindeiro 28 de febreiro, no plenario da décimo quinta Asemblea Nacional da formación. Sobre a mesa do máximo órgano entre asembleas estarán as teses elaboradas pola comisión redactora das teses nas últimas semanas, unha proposta política e organizativa que, tras o proceso de debate e emendas, terá que servir como guieiro da formación frontista no transcendental ano electoral en ámbitos tan sensibles como o funcionameno interno, as apostas estratéxicas ou a política de alianzas.

Palabras como "reseteo", "reformulación" ou mesmo "reinvención" veñen ecoando a respecto dun proceso no que, ao carón destes relatorios, se formularán votos particulares e emendas xa anunciados nos últimos días. O panorama interno é máis matizado e menos binario que noutras ocasións pero, moi probablemente, tamén máis transcendental que en citas anteriores, mesmo máis que na asemblea de Amio, momento clave na historia recente do Bloque, do que agora se cumpren catro anos.

O relatorio proposto pola comisión, composta por case unha vintena de persoas, parte da base de que o BNG afronta, necesariamente, un "novo escenario político" no que "a política se coverteu, en grande medida, nun espectáculo" no que "o acceso aos grandes medios de comunicación é absolutamente determinante". "Son moi poucos actores e sempre os mesmos os que teñen ese privilexio" e entre eles non se atopa o soberanismo galego, salientan.

A comisión redactora indica que "a dureza dos resultados" das xerais "deben chamar a unha profunda e demorada reflexión"

Este é o caso, diagnostican, de Podemos, "forza política lexitimada" en Galicia "por se presentar en coalición cunha forza galega" que "tivo máis facilidades para entrar no electorado nacionalista" que noutras ocasións optara polo BNG. "Certos elementos discursivos e de acción política" do partido de Pablo Iglesias fan que sexa "atractivo para unha parte da nosa bases social e disputan unha parte do noso espazo electoral", salientan, como parte dun panorama no que "a dureza dos resultados das eleccións xerais" para NÓS-Candidatura Galega "deben chamar a unha profunda e demorada reflexión no seo do BNG sobre as causas do continuo devalo electoral".

A 'Iniciativa Máis Alá' 

É neste contexto no que o grupo redactor das teses propón o lanzamento da 'Iniciativa Máis Alá', un plan que, recollendo o nome do manifesto vangardista de Manoel Antonio e Álvaro Cebreiro, tería como obxectivo ser "unha ferramenta participativa para a reformulación e apertura dunha nova etapa no proxecto político do nacionalismo". Trataríase, segundo estes textos, de "recabar opinións" entre a "base social e electoral" do BNG para "analizar" a "percepción social" que suscita e "definir colectivamente as liñas mestras" da nova etapa.

O texto propón un proceso "participativo" para a "reformulación" do proxecto do Bloque que culminaría, dentro dun ano, nunha nova asemblea nacional

O proceso, propón o relatorio, sería lanzado polo novo Consello Nacional e desenvolveríase, como máximo, durante un ano que culminaría nunha nova asemblea nacional. Tería como destinatarias "a todas as persoas que se sintan nacionalistas, soberanistas, independentistas, galeguistas ou simplemente compartan, como galegas, a necesidade de a Galiza ter un instrumento político netamente soberano, sen dependencias de forzas políticas estatais".

Esta, indica, debera ser a base dunha xeira na que o BNG desenvolva un discurso "claro, pedagóxico e actualizado" e "en positivo sobre o nacionalismo" en xeral e o Bloque en particular. A aposta, din, é "crear un discurso disidente e clarificador, sen medos, con propostas e sempre positivo" que incida especialmente na mocidade, toda vez que, indican, o "feble apoio" da xente nova á organización nos últimos procesos electorais é xa "un problema estratéxico".

Política de alianzas

"As alianzas de IU, Podemos e Anova son lexítimas e respectábeis, mais encarnan outro proxecto diferente ao noso"

É, como concorrer a esas eleccións, a comezar por 2016? A tese "entende que debemos garantir unha opción nacionalista e de esquerdas" con "incidencia" e "sen subordinarse a ningunha forza política de ámbito estatal". Cómpre, resaltan, "tirar conclusións" sobre o proceso de procura de alianzas previo ao 20-D e "coidar e cultivar" experiencias como a de NÓS no canto de explorar posibles confluencias con En Marea. "As alianzas de IU, Podemos e Anova son lexítimas e respectábeis, mais encarnan outro proxecto diferente ao noso", conclúen.

Cambios organizativos como a maior apertura á "participación das persoas simpatizantes na vida interna", potenciar a formación ou suprimir a "obrigatoriedade de seren persoas diferentes as que asuman a portavocía nacional e a candidatura á presidencia da Xunta", retornando así ao modelo previo a 2009, inclúense tamén nos relatorios da comisión redactora. Os textos confróntanse este sábado coas emendas e ata tres votos particulares no Consello Nacional e, a continuación, serán debatidos e emendados nas comarcas.

Consello Nacional do BNG CC-BY-SA BNG

Despece

  • Votos particulares e emendas

    Entre os votos particulares formulados ao relatorio da comisión figura o formulado polas actualmente deputadas Carme Adán e Tereixa Paz baixo o título 'Nacionalismo para o futuro: Refundación, unidade e activismo'. Neste documento Adán e Paz analizan os resultados electorais do Bloque nos últimos anos como "un síntoma de algo moito máis complexo que padecemos no político, no social e no organizativo". Na liña do expresado por Adán nos últimos días, a aposta deste texto é "refundar o proxecto nacionalista" dende unha "profunda autocrítica" que procure "manter a unidade do BNG" e "aumentar o seu pluralismo".

    No ámbito electoral coidan necesaria unha "nova política de alianzas flexible e o máis ampla posible" que se ratifique en asemblea e atenda a "principios irrenunciábeis". Estes, din, sería a defensa do dereito de autodeterminación, a creación da banca pública galega ou a "defensa e recuperación dos servizos públicos", entre outros,

    A aposta por explorar alianzas alén do que actualmente representa o propio Bloque está tamén presente noutro voto particular xa formulado, o asinado pola profesora Alba Nogueira, integrante do actual Consello Nacional. Este texto avoga por tentar conseguir unha opción electoral conxunta do nacionalismo e "as esquerdas" que propicie o cambio de Goberno en Galicia. Asemade, cre necesario reconsiderar o actual modelo de militancia no Bloque para substituílo por un novo, de adscrición individual.

    Como entre o texto pola comisión redactora e os, cando menos, dous votos particulares, tamén existe pluralidade de visións nas case 120 emendas que, segundo as fontes consultadas por este diario, estarán a debate no Consello Nacional, algunhas delas asinadas por militantes alleos á actual dirección e outras, por deputados, edís e tamén polo actual portavoz nacional, Xavier Vence, que non recuncará no cargo. Algunhas desas achegas atinxen a aspectos máis técnicos dos textos, mentres que outras propoñen diagnósticos alternativos ao formulado no relatorio ou propoñen mudanzas na política de alianzas ou tamén na elección de candidaturas, con fórmulas como as primarias abertas.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza