A portavoz do BNG, Ana Pontón, prometeu que os nacionalistas "exhumarán" o "posfranquismo" e que reclamarán "todo o patrimonio roubado" e "espoliado" ao pobo galego. Ademais, nun acto na Coruña fronte á Casa Cornide, unha das propiedades dos Franco na comarca, asegurou que hai "presións" da Casa Real ao Executivo para que non esixa a devolución do Pazo de Meirás e dixo ter "datos". 

Membros do Bloque despregaron unha pancarta cunha foto co rei emérito Juan Carlos I e o ditador Franco, acompañada das frases Franquismo Nunca Máis e Que nos devolvan ou roubado. Pontón denunciou "un franquismo sen Franco" e sinalou a "involución democrática" de forzas políticas "machistas, racistas e antigales". Así, contrapuxo o "compromiso claro" do BNG para, no caso de obter escano no Congreso, "conseguir que se interpoña unha demanda civil para recuperar a titularidade do Pazo de Meirás", porque o "Estado ten toda a documentación nas súas mans para que esa reclamación vaia adiante".

Pontón sinalou o "compromiso claro" do BNG para  "conseguir que se interpoña unha demanda civil para recuperar a titularidade do Pazo de Meirás"

Pontón que o BNG dispón de "datos" que lles "permiten denunciar con toda certeza que se o Executivo de Pedro Sánchez non puxo esa reclamación é porque hai presións directas da Casa Real para que non leve a cabo a devolución do Pazo de Meirás", algo que, destacou, "non" lles "sorprende", dadas "as conexións entre a monarquía e o franquismo, pois todo empezou co ditador nomeando como sucesor ao actual rei emérito".

Por outra banda, o candidato pola Coruña, Néstor Rego, criticou "a covardía política" de Pedro Sánchez "diante das presións dos poderes fácticos e moi directamente de Felipe de Borbón que fixo que non iniciase ese expediente de reclamación de devolución". 

En paralelo, Pontón comprometeu que tamén reclamarán que se devolva ao patrimonio público os bens "espoliados" e "roubados aos galegos" como "botín de guerra", isto é, a Casa Cornide da Coruña e as estatuas de Abraham e Isaac da catedral de Santiago.

Entre as propostas nacionalistas tamén figura a ilegalización da Fundación Franco e o cumprimento e maior dotación da Lei de Memoria Histórica. Pontón tamén comprometeu a derrogación da Lei Mordaza e a defensa dos dereitos e liberdades, "fronte ás forzas ultra reaccionarias".