A Alianza Libre Europea (ALE), grupo parlamentario no que se inclúe o BNG no Europarlamento, vén de enviar unha carta á comisaria de Emprego comunitaria, Marianne Thyssen, para que "condene" o "despedimento político" sufrido por Maite Mouriño -traballadora á que a empresa Esycsa botou do traballo por presentarse nunha lista electoral do Bloque- e "interveña para que poida volver ao seu emprego e se lle garantan os seus dereitos a exercer os seus dereitos políticos e sociais".
ALE pide á comisaria de Emprego que "condene" a decisión da empresa e "interveña" para que Mouriño sexa readmitida
Maite Mouriño, tal e como explicou este luns a parlamentaria nacionalista Carme Adán, decidiu participar como número tres da candidatura do BNG ao Concello de Pazos de Borbén. Un mes máis tarde, e logo de once anos na compañía, recibiu a carta de despido. Para xustificar esta decisión, a empresa -que forma parte do grupo ACS- presentoulle fotografías da súa actividade política co Bloque feitas por un detective privado.
Na carta -asinada por François Alfonsi, presidente da ALE, e Ana Miranda, secretaria de Relacións Internacionais do BNG e vicepresidenta tamén de ALE-, o grupo da Eurocámara advirte de que prácticas coma estas "son completamente inaceptables e propias do século XIX". "Calquera debería ser completamente libre para exercer os seus dereitos fundamentais e participar na vida política sen tipo ningún de restriccións e, por suposto, sen temor a perder o seu emprego", din.
A empresa xustificou o seu despedimento na súa actividade política e presentou fotos tiradas por detectives privados
Por todo isto, ALE insiste en que a comisaria de Emprego condene "inmediatamente" este despedimento e interveña para que Maite Mouriño recupere o seu emprego. "Esta é a única solución aceptable", remata.
Antes, xa en Galicia, o Bloque reclamou tamén a intervención da Xunta ante esta "persecución política" e lembra que a empresa Esycsa pertence ao grupo ACS, está relacionada cun gran número de concesións públicas nos concellos galegos e "gábase de contar co recoñecemento público de respectar os dereitos dos traballadores e traballadoras”.
