O PP sufrirá un forte castigo en Galicia, se se confirman os datos achegados polas enquisas a pé de urna que se veñen de publicar. Os populares seguirían sendo a forza máis votada en Galicia, co 34,5% e 9-10 escanos (cun descenso de ata seis deputados e 18 puntos). En Marea entraría con forza no Congreso, co 27% dos votos e 6-8 representantes, garantíndose a consecución dun grupo parlamentario propio. O PSOE tamén experimentaría un forte descenso en Galicia, acadando o 18,38% dos apoios e 4 ou 5 escanos (en 2011 tivo 6 e o 28% dos votos). Ciudadanos obtería tamén representación, cun 10,7% dos votos e 1-2 escanos. Nós obtería o 5,3% e ningún escano. En 2011 o BNG acadou o 11% dos votos e dous representantes.
Por provincias, na Coruña o PP sería a forza máis votada (33,5%), por diante de En Marea (27,5%). En cambio, en Pontevedra é esta formación a que lidera (31,3%), superando por dúas décimas os populares (31,1%). O PP gañaría con máis claridade en Lugo e Ourense, por diante do PSOE na provincia lucense e de En Marea na ourensá.
A Coruña | Lugo | Ourense | Pontevedra | Galicia | |
---|---|---|---|---|---|
PP | 3 (5) 33,5% (51,5%) | 2 (3) 40,1% (56,1%) | 2 (3) 41,5% (56,7%) | 2-3 (4) 31,3% (50,8%) | 9-10 (15) 34,5% (52,5%) |
En Marea | 2-3 27,5% | 1 19% | 1 21,3% | 2-3 31,1% | 6-8 27% |
PSOE | 1-2 (2) 19,20% (27,3%) | 1 (1) 23% (28,4%) | 1 (1) 18,7% (28,1%) | 1 (2) 18,2% (28,1%) | 4-5 (6) 18,38% (27,8%) |
Ciudadanos | 1 11,1% | 0 8,3% | 0 10,5% | 0-1 11,1% | 1-2 10,7% |
Nós-CG | 0 (1) 5,50% (11,7%) | 0 (0) 5% (9,2%) | 0 (0) 4,9% (9,3%) | 0 (1) 5,5% (12) | 0 (2) 5,3% (11,2%) |
É a información da sondaxe de TND Demoscopia difundida por TVE e a Forta, que a nivel estatal outorga a vitoria ao PP co 26% dos votos e 114-118 escanos, cun forte descenso con respecto a 2011. Podemos (21% e 76-80 escanos) e PSOE (20% e 80-85 escanos) compiten polo segundo posto. Ciudadanos quedaría co 15,5% dos votos e 47-50 deputados
Por outra banda, segundo a enquisa de GAD 3 para Antena 3, o PP tamén gañaría as eleccións con entre 121 e 124 deputados, seguido do PSOE, que alcanzaría entre os 79 e os 83 deputados. Podemos situaríase como a segunda forza política máis votada cunha marxe de 70 a 74 escanos e Ciudadanos quedaría na cuarta posición con entre 46 e 50. En porcentaxe de votos, os populares obterían o 28,1%, mentres que o segundo posto sería para Podemos (onde se inclúen confluencias como En Marea), co 21,1%. O PSOE obtería o 20,4% e Ciudadanos, o 14,9%. En canto ao resto de forzas políticas, Unidad Popular-IU acadaría entre 2 e 4 deputados, Democracia i Llibertat entre 5 e 7; ERC, entre 8 e 9 escanos; PNV, entre 5 e 6; e Bildu, entre 2 e 4. Coalición Canaria, entre 0 e 1 e Geroa Bai, entre e 1 tamén.