Iñaki Urdangarin debe ir ao cárcere. O que en principio era un desenlace temido para o caso Nóos converteuse agora na única opción que barallan na Zarzuela como salvagarda da Casa Real. Así o confirmaron a eldiario.es fontes do Goberno e do principal partido da oposición, ambas en permanente contacto coa Casa Real. Na Moncloa e en Ferraz viven con preocupación a deriva de acontecementos que están a afundir o prestixio e apoio cidadán da monarquía.

"A xente non entendería que Urdangarin se librase de todo isto sen pasar polo cárcere". A frase é dun membro do Goberno de Rajoy que asegura que esa liña argumental é a que lle transmite á súa contorna o propio monarca. Para o rei, "a liña vermella é a infanta Cristina", afirma esa mesma fonte. Na oposición confirman esa mesma tese. "Urdangarin debe caer para que a monarquía se salve", asegura un importante dirixente do PSOE. Segundo as fontes consultadas, só así se poderá encher de sentido a frase do monarca durante o discurso de Nadal na que afirmaba que a xustiza é igual para todos.

A data para a abdicación? A máis probable: nos meses posteriores ao peche da instrución do caso Palma Arena pero antes de que comece o xuízo a Iñaki Urdangarin

O caso Urdangarin non só lle vai custar unha presumible condena ao xenro do rei, tamén é unha das claves noutra operación que cada día parece máis probable: a abdicación do rei a favor do seu fillo, o príncipe Felipe. A pesar dos rotundos desmentidos que difundiu a Casa Real, outras fontes confirman que a abdicación está sobre a mesa pola mala saúde do rei e pola deterioración da imaxe da monarquía co proceso ao seu xenro.

A data para a abdicación? A máis probable: nos meses posteriores ao peche da instrución do caso Palma Arena pero antes de que comece o xuízo a Iñaki Urdangarin.