Antes de chegar ao Congreso para ser debatida, votarse e converterse en lei, a reforma do aborto de Gallardón pasa por mans de asociacións e entidades como o Comité de Bioética, un organismo público, en teoría independente, que xa emitiu un informe favorable sobre a nova norma. Grazas ao atraso na aprobación da lei (o Goberno prometeuna inicialmente para outono de 2012), os encargados de valorar a medida (o Anteproxecto de Lei Orgánica de protección da vida do concibido e dereitos da muller embarazada) foron os membros máis recentes, moito máis  próximos ás posicións do PP que os que formaban a composición anterior do comité.

A Ministra de Sanidade, Ana Mato, asinou o 19 de decembro de 2012 unha orde para renovar aos membros do Comité de Bioética unha vez expirados o catro anos no cargo dos anteriores. A elección dos seus 12 compoñentes repártese a medias entre as comunidades autónomas e o Goberno, a través dos ministerios implicados ( Economía, Sanidade -que elixe a tres-, Xustiza e Industria). En total, polo menos 7 dos 12 elixidos declaráronse abertamente antiabortistas.

Designados polo Goberno

A elección dos ministerios de Economía e de Sanidade permiten a Carlos Alonso Bedate e a César Nombela Cano, que xa formaban parte do equipo anterior, permanecer, catro anos máis, no comité. Ambos foron as únicas voces discrepantes cando o comité avalou a reforma do aborto de José Luís Rodríguez Zapatero en 2009. Alonso, licenciado en filosofía, teoloxía e bioloxía, manifestou que era unha norma "eticamente inaceptable".

Nombela, pola súa banda, emitiu un voto particular en contra da decisión do comité. Catedrático en Microbiología, expresidente do CSIC e reitor da Universidade Internacional Menéndez Pelayo (UIMP), é un dos promotores do manifesto de Madrid de 2009 contra a lei socialista, asesor do Museo da vida de Barcelona, unha especie de exposición permanente sobre os males do aborto, e firme detractor da eutanasia e da interrupción do embarazo en todos os supostos.

A presidenta do Comité vicepresidiu a Fundación Acción Familiar

Comparte a súa postura Natalia López Moratalla, presidenta da Asociación Española de Bioética. De feito, a asociación que preside xa se mostrou favorable á reforma. A presidenta do Comité de Bioética é María Teresa López López, que foi vicepresidenta da Fundación Acción Familiar, unha entidade conservadora que xa defendeu a reforma de Gallardón nun comunicado. Aínda que xa non ten cargo formal na organización, López mantén o seu vínculo: dirixe a Cátedra Extraordinaria de Políticas de Familia da Universidade Complutense-Acción Familiar.

Acompáñaos José Miguel Serrano Ruiz-Calderón, profesor de Filosofía do Dereito na Universidade Complutense de Madrid e vogal da xunta directiva da Asociación Bioética da Comunidade de Madrid, con posicións claramente contrarias á investigación con células nai e a mesma postura ante o aborto que a asociación estatal. Fidel Cadena Serrano , fiscal do Tribunal Supremo, completa a rolda de seis membros nomeados polo Goberno. Unha curiosidade: Cadena foi nomeado fiscal o mesmo día que o agora ministro Gallardón.

Designados polas comunidades autónomas

Entre os designados polas comunidades autónomas, con maioría popular, atopamos a Nicolás Jouve de la Barreda, catedrático de Xenética e impulsor tamén do manifesto de Madrid en 2009 contra a reforma da lei do aborto do PSOE. Ademais, Jouvé é cofundador e presidente de Cívica, a "Asociación de Investigadores e Profesionais pola vida". Aínda que o título xa adianta por onde van os tiros, a páxina web deixa clara a súa postura: inclúe un contador de nenos mortos por abortos ao minuto. Ademais, Jouvé é asesor da empresa Vidacord, que se autodefine como o " primeiro banco de células nai procedentes do sangue do cordón umbilical".

Un dos membros pertence a unha asociación que inclúe na súa web un "contador de nenos mortos"

Acompáñaos Vicente Bellver Capella, profesor de Filosofía e Dereito e abertamente contrario á investigación con células nai e o aborto; Federico de Montalvo, avogado e profesor da Universidade Pontificia de Comillas, que exerce de vicepresidente; e Manuel de los Reyes López, cardiólogo e membro de honra da Asociación de Bioética fundamental e clínica.

Os outros dous designados polas comunidades son Carlos Romeo Casabona, director da cátedra de Dereito e Xenoma Humano da Universidade do País Vasco e un do tres membros que permanece no comité tras o baile de cadeiras xunto a Alonso e Nombela. Tamén se atopa Pablo Ignacio Fernández Muñiz, médico, que foi suplente na lista electoral do PSOE para Avilés en 2007. Ambos son os únicos avalados por comunidades autónomas socialistas.