O Concello de Monforte confirma un ataque con dous "cócteles molotov", unha semana depois de que a conselleira de Política Social anunciase a súa intención de destinar este inmoble ao "primeiro centro específico para menores estranxeiros"
Hai unha semana, o 13 de setembro, a conselleira de Política Social, Fabiola García, anunciou que o edificio residencial Francisco Suárez que a asociación Prodeme ten en Monforte sería "o primeiro centro específico para menores estranxeiros que se abrirá en Galicia para afrontar o traslado impulsado polo Goberno central". Menores que o Goberno galego viña integrando no sistema ordinario de protección ata este anuncio.
Na madrugada deste sábado o inmoble recibiu o impacto de dous artefactos incendiarios, un ataque que está a ser investigado pola Policía Nacional. O Concello de Monforte confirma que houbo dous "cócteles molotov", un deles entrou no comedor da planta baixa por unha ventá previamente forzada e o outro quedou fóra do edificio. O que estalou dentro do edificio provocou un lume que acabou por derreter a instalación eléctrica.
O fume ascendeu pola escaleira do inmoble sen provocar danos, que se concentran no comedor, segundo traslada o Concello, que explica que pasadas as tres da madrugada a Policía Nacional informou ao alcalde de que o lume estaba "controlado".
"Condenamos taxativamente os actos vandálicos acontecidos no edificio, que mesmo semellan un atentado. Unha sociedade pacífica como a monfortina non pode nin debe admitir actos como este", afirma o rexedor de Monforte de Lemos, José Tomé Roca, a través dun comunicado.
"Pedimos prudencia e deixemos que a Policía continúe coa investigación para que aclare canto antes o sucedido", indica a conselleira de Política Social
O tamén presidente da Deputación de Lugo vén de convocar unha xunta de voceiros municipal para o luns ás nove da mañá para analizar a situación conxuntamente con todos os grupos políticos da corporación "e formular un rexeitamento unánime de todos os concelleiros diante dos feitos tan graves que se veñen de producir".
"Desde a Xunta de Galicia condenamos con toda firmeza os ataques esta madrugada ao centro da Asocación Prodeme en Monforte. Pedimos prudencia e deixemos que a Policía continúe coa investigación para que aclare canto antes o sucedido", indica a conselleira de Política Social, sen axenda pública para este sábado, desde a súa conta de Instagram.
O propio Concello de Monforte recolle no seu comunicado que pasaron só sete días do anuncio da Xunta sobre esta modificación do seu sistema de protección da infancia e adolescencia. Unha decisión que Fabiola García vinculou á "imposición" do Goberno de España que, nas súas palabras, "obriga á Xunta a facer o que non quería, crear centros específicos para menores estranxeiros" polos 317 nenos e nenas que lle corresponde acoller a Galicia nun reparto estatal que a Xunta ten recorrido na xustiza.
O Concello de Monforte indica que a Polícia terá que investigar "mensaxes que circularon previamente nas redes sociais nas que se indicaba que 'esto arránxase con gasolina"
Seguindo a información sobre a investigación que facilita o consistorio, as imaxes das cámaras de seguridade mostran a varias persoas no exterior do edificio na noite do venres ao sábado. Unhas imaxes que serán analizadas polos axentes da Policía, que tamén terán que atender a "mensaxes que circularon previamente nas redes sociais nas que se indicaba que 'esto arránxase con gasolina".
O incidente neste edificio destinado a acoller a 80 menores está a ser relacionado co racismo e o odio. O delegado do Goberno de España en Galicia, Pedro Blanco, manifestou a través da súa conta na rede social X a súa "condena" rotunda a un ataque que cualificou de "intolerable" e "que pon en cuestión a convivencia e respecto da nosa sociedade". "As administracións temos a responsabilidade de actuar con firmeza, evitar discursos que alimenten o odio e garantir a seguridade dos menores", asevera Blanco.
"Pedímoslle ao PP que deixe de facer política ruín e partidista con nenos e nenas que están sós, que perderon ás súas familias e que o que necesitan é unha oportunidade", insistiu Pontón
A líder da oposición en Galicia, Ana Pontón, condenou "enerxicamente" o atentado desde a reunión do Consello Nacional do BNG que se celebrou na mañá deste sábado en Teo. "Vemos con preocupación a un PP que importa o discurso racista e de odio contra os máis débiles, como están a facer cos nenos e nenas que temos que acoller", afirmou a portavoz nacional do Bloque. "Pedímoslle ao PP que deixe de facer política ruín e partidista con nenos e nenas que están sós, que perderon ás súas familias e que o que necesitan é unha oportunidade", insistiu Pontón.
Pola súa banda, o secretario xeral do PSdeG, José Ramón Gómez Besteiro, sinalou que este tipo de delitos de odio son "consecuencia directa" dunhas mensaxes e dunha ideoloxía "que entre todos e todas temos que parar". "Esas actitudes merecen o noso desprezo e a nosa condena clara", sostivo o líder socialista desde Pontevedra.
Mentres que o director xeral de Familia, Infancia e Dinamización Demográfica, Jacobo Rey, quen acompañou a Fabiola García na visita a Monforte da semana pasada, participou esta maña nun encontro autonómico
de familias acolledoras onde ensalzou o sistema de protección de menores da Xunta por ser "un dos máis integradores e inclusivos". Un modelo co que racha, precisamente, a inclusión de centros segregados para nenos e nenas migrantes.
O ataque en Monforte produciuse na mesma noite na que a veciñanza da Ribeira Sacra permanecía alerta pola incidencia do incendio forestal declarado o pasado xoves en Pantón, que xa arrasou máis de mil hectáreas de superficie. Un lume que se achegou ás casas e provocou a activación da Situación 2 de emerxencia.
