Galicia sae este luns do estado de alarma, pero aínda así determinadas actividades seguirán sen estar permitidas, manténdose as restricións en discotecas, ludotecas e tamén na organización de festas populares e verbenas, que seguirán prohibidas cando menos ata o 1 de xullo.
Mantéñense as restricións na organización de festas populares e verbenas, que seguirán prohibidas cando menos ata o 1 de xullo
Este sábado a Xunta publicou no DOG que “sempre que a evolución da situación epidemiolóxica así o aconselle, a Administración autonómica poderá permitir o restablecemento, a partir do 1 de xullo” das "festas, verbenas e outros eventos populares, así como as atraccións de feiras”. Suponse que a partir dese momento comezarán a eliminarse as restricións, pero aínda se descoñece cando sucederá isto e que tipo de limitacións e medidas de seguridade se esixirán. É por isto que dende os concellos e tamén dende as empresas do sector (orquestras, organizadores de feiras...) esixen que o Goberno galego fixe canto antes os criterios e protocolos que rexerán estas actividades.
Os concellos carecen de competencias e profesionais no ámbito sanitario para asumir esa responsabilidade e garantir a seguridade
A Federación Galega de Municipios e Provincias pediu este sábado "que a Xunta proporcione aos concellos unhas directrices concretas sobre a organización destes eventos". Alberto Varela, presidente da Fegamp, sinala que esta "é unha situación tan excepcional que no caso de que se poidan celebrar verbenas populares non podemos ampararnos só na Lei de espectáculos senón que os concellos temos que ter instrucións claras das autoridades sanitarias galegas sobre que medidas extraordinarias teríamos que adoptar”.
Nas últimas semanas, Varela veu mantendo distintas reunións con representantes de empresarios de orquestras, feirantes e atraccións, indicándolles a interese por parte dos concellos de organizar estes eventos tanto para satisfacer a demanda da cidadanía como pola repercusión para o tecido económico da zona. Porén, explicoulles que os concellos carecen de competencias e profesionais no ámbito sanitario, e que para asumir esa responsabilidade e garantir a seguridade tanto dos traballadores como dos veciños e veciñas asistentes aos eventos é preciso que a Xunta elabore un documento coas medidas a seguir.
Festas con eventos simultáneos espallados polas cidades
Mentres, os concellos traballan xa na organización das festas deste verán, apostando por evitar aglomeracións e por actividades que garantan a seguridade para as persoas asistentes, pero aínda sen os criterios que deberán rexer estes eventos. En Ferrol, por exemplo, o Concello prepara un modelo de celebración “amable e próximo” que permita evitar grandes aglomeracións ao tempo que recuperar a “alegría nas rúas” e o “pulo cultural”. Entre os días 22 e 31 de agosto a cidade contará cun 50 espectáculos de pequeno formato espallados polo territorio municipal, cinco cada día, cada un en outros tantos puntos distintos.
Tamén Pontevedra prepara festas "sen aglomeracións e con actuacións simultáneas" en 13 escenarios en diferentes puntos do centro e e dos barrios da cidade. Esta multiplicidade de espazos permitirá "combinar o calendario festivo e a programación de verán coa seguridade das persoas, tanto público como artistas e traballadores", sinala o Concello.
Igualmente, en Lugo nesta edición das festas de San Froilán "aumentaranse as actividades escénicas en distintos puntos de Lugo no canto de promover grandes concertos”, explican dende a Concellaría de Cultura. nunha edición na que os protagonistas serán grupos musicais lucenses. “Queremos que o San Froilán siga sendo a gran festa do outono galego, mais tamén garantir a seguridade da veciñanza de Lugo”, sinalou a concelleira Maite Ferreiro.
A crise no sector das orquestras
Os sindicatos CIG, CCOO e UGT reclámanlle ao Servizo de Emprego Público Estatal (SEPE) que lle abone as prestacións por desemprego derivadas dos ERTE a todo o persoal das orquestras dende a data de entrada en vigor do estado de alarma. Os arredor de 3500 traballadores/as do sector das orquestras de Galicia, entre artistas e persoal técnico, están a verse afectados/as por unha problemática que os deixa “en situación de desamparo”: o SEPE está a denegar os ERTE e obrígaos/as a devolver os cartos que percibiron xa que moitos deles/as estaban dados/as de baixa cando se decretou o estado de alarma.
Durante a xuntanza celebrada hoxe na Coruña, o xefe da Inspección de Traballo de Galicia incidiu na necesidade prestarlle unha atención ao sector de orquestras atendendo ás súas especiais características e adiantou que lles trasladará as propostas dos sindicatos tanto ao SEPE como ao propio Ministerio de Traballo. Ao mesmo tempo, solicítanlle ás empresas a transformación dos contratos temporais -maioritarios no sector- en fixos-discontinuos unha vez que se retome a actividade normal. Con excepción dende o 1 de xuño até o 30 de setembro, onde a contratación deberá ser continuada.
