O incendio en Folgoso do Courel queimou máis de 100 hectáreas e obrigou a activar a situación 2 pola proximidade do lume ás casas
Máis de 300 hectáreas arderon nas últimas horas en Galicia. As altas temperaturas e o tempo seco facilitaron a expansión de varios incendios, entre os que destaca o rexistrado no concello de Folgoso do Courel, na parroquia de Meiraos, que obrigou a activar a sitaución 2 --xa anulada-- pola proximidade do lume ás casas do lugar de Portela, na parroquia de Gundriz do municipio limítrofe de Samos.
O incendio, segundo informa a Xunta, iniciouse perto da medianoite pasada e permanece aínda activo nas primeiras horas deste xoves logo de queimar sobre 200 hectáreas. Na súa extinción traballan dous axentes, oito brigadas, catro motobombas e unha pa, aínda que as malas condicións meteorolóxicas están imposibilitando os traballos aéreos.
Dous incendios en Cerdedo-Cotobade e Rodeiro queimaron 50 e 90 hectáreas respectivamente
Ademais, permanece activo un incendio en Cerdedo-Cotobade, na parroquia de San Xurxo de Sacos, que se inicio tamén sobre a media noite pasada e que xa supera as 0 hectáreas queimadas.
Tamén está activo o incendio rexistrado na parroquia de Pedroso, no concello de Rodeiro, que como nos dous casos anteriores tamén se iniciou perto das 12 da noite pasada e que rolda as 90 hectáreas queimadas.
Estes tres incendios están aínda sen controlar, ao contrario que o rexistrado en Monforte de Lemos, na parroquia de Marcelle, que permanece activo desde as dúas da tarde do pasado mércores e que xa queimou unhas 38 hectáreas, das cales 30 son arboradas e 8 de monte raso.
Por outra banda, quedou extinguido outro incendio en Calvos de Randín rexistrado na pasada noite logo de queimar perto dunha hectárea dentro do Parque Natural da Baixa Limia-Serra do Xurés. Ademais, nos últimos días arderon tamén máis de 17 hectáreas nun fogo en Viana do Bolo e case 30 noutro rexistrado no Courel.