A Fiscalía pide varios anos de cadea e multa millonaria a cinco dirixentes da entidade e outros cinco empresarios que facilitaron facturas falsas coas que xustificar as subvencións
A sala compostelá da Audiencia Provincial da Coruña acolle este martes un xuízo contra a directiva de hai unha década da asociación de hostaleiros de Santiago. Os cinco máximos dirixentes daquela da entidade e outros cinco empresarios que supostamente os axudaron facilitándolles facturas falsas están acusados de actuar "de común acordo" para o cobro fraudulento de axudas públicas.
Segundo o escrito de acusación da Fiscalía, os cinco acusados, "con ánimo de enriquecemento", falsearon os requisitos esixidos por varias subvencións públicas e "achegaron facturas que non obedecían a unha prestación real de servizos". Facturas que eran "meros artificios que non responden a ningún gasto efectivo". Tamén "falsearon as contas anuais da asociación".
A Fiscalía sinala como axudas cobradas fraudulentamente unha de 102.000 euros para a desestacionalización turística asociada á promoción do Camiño Inglés a Santiago, outra de 250.000 euros para a reforma da sede da asociación, na rúa Salvadas de Santiago, e unha terceira de 35.000 euros para a mellora enerxética desas instalacións.
Segundo a Fiscalía os acusados recibiron 250.000 euros para reformar a sede da asociación cunha factura falseada en 2011 malia que a obra xa se fixera en 2009
No caso da reforma da sede, por exemplo, a Fiscalía di que as obras se realizaran en 2009 pero que "de común acordo" co responsable da empresa que realizou os traballos "modificaron a data dunhas das facturas presentadas para obter a subvención para que entrara dentro do período subvencionable", en 2011.
Estes feitos son para a Fiscalía constitutivos dun delito continuado de fraude de subvencións, cinco delitos de falsidade documental e un delito societario.
Para cada un dos cinco ex-directivos acusados o ministerio pide cinco anos de cadea pola fraude continuada, dous anos e medio por cada un dos delitos de falsidade documental e outros dous anos e medio polo delito societario. Ademais, a Fiscalía pide multas de distintas contías por cada un dos delitos que, só no caso da fraude, ascenden a máis de 1,5 millóns de euros.
Pola súa banda, os cinco empresarios que facilitaron as facturas falsas afrontan unha petición de dous anos e medio de cadea para cada un por falsidade documental.