As webs e aplicacións relacionadas coa meteoroloxía atraen a nosa atención nestas datas. Cunha primavera fresca e húmida que ameaza con estenderse ben máis alá do 40 de maio e os períodos vacacionais de moitos a piques de iniciarse, ou co antollo de pisar as praias, é pregunta recorrente estes días o de que tempo vai facer? Os meteorólogos Carlos F. Balseiro, Pablo Carracedo, Beatriz Hervella e Eduardo Penabad lanzarán o vindeiro 2 de xullo 4gotas.com, unha páxina de información meorolóxica que quere ir máis aló en moitos ámbitos e servir para algo máis que dicir se chove ou vai sol. 

Como nos contaba Carlos Balseiro hai unhas semanas, 4gotas "tentará darlle unha volta á información océano-meteorolóxica. Tentará facela máis humana, máis próxima á xente"

Como nos contaba Carlos Balseiro hai unhas semanas, 4gotas "tentará darlle unha volta á información océano-meteorolóxica. Tentará facela máis humana, máis próxima á xente". Na web haberá prognósticos do tempo a nivel mundial e para 15 días, facendo especial fincapé en Galicia e nos eventos ao aire libre que se celebran no país (partidos de fútbol, rallies, carreiras populares, festas, etc). Pero o obxectivo é ir máis aló: a páxina conterá máis información que as actuais páxinas do tempo, con vídeos, con interacción cos usuarios nas redes sociais e información personalizada, cunha análise en perspectiva xornalística do que é noticia canto ao tempo e mesmo mesturando a meteoroloxía coa saúde. Tamén se ofrecerán predicións rápidas nunha sección chamada En 10 segundos, e igualmente información detallada con máis de 140 puntos próximos á costa e en alta mar cun horizonte de previsión de 9 vías (fundamental para os mariñeiros).

A web, que emprega software libre e foi creada polo equipo da Navalla Suíza, está nestes momentos en probas pero xa realizou unha primeira cobertura ofrecenso predicións para esta noite de San Xoán.