As tres universidades galegas veñen de facer público un comunicado para amosar o seu "enérxico rexeitamento" á rebaixa salarial imposta pola Xunta, que cualifican de "novo ataque ás traballadoras e traballadores públicos de Galicia" que se suma aos xa realizados polos gobernos do estado e autonómico nos últimos anos. A Universidade de Santiago, a Universidade da Coruña e a Universidade de Vigo denuncia que "estes ataques, que se fundamentan desde os gobernos sobre a necesidade de axustes orzamentarios", teñen "unha base ideolóxica que persegue a minoración do público en beneficio doutras iniciativas". E engaden que "a diminución dos salarios, a paralización das convocatorias de emprego ou a consideración das traballadoras e traballadores públicos como un sector privilexiado son só un chanzo máis no desprestixio do público".
Denuncian que estes ataques teñen "unha base ideolóxica que persegue a minoración do público en beneficio doutras iniciativas"
O texto fai fincapé en que o ataque se concentra dun xeito especial no ensino público, "que se desprestixia a través da descualificación do persoal, da minoración dos seus salarios, do incremento da súa carga de traballo, do deterioro das súas condicións laborais e da posta en cuestión da súa calidade ou excelencia". No caso das universidades estes feitos "engádense aos recortes en investigación e á aplicación indiscriminada de normas e leis orzamentarias que mesmo dificultan a captación de recursos externos". Tamén sinalan que o estudantado, "e particularmente aquelas e aqueles con menos recursos económicos, a parte máis feble da comunidade universitaria", sofre "a diminución das bolsas de estudo".
Cren preciso "facer visible a unidade de actuación das tres universidades do sistema universitario de Galicia. Primeiro, no rexeitamento común destas medidas. En segundo lugar na aplicación homoxénea do axuste retributivo"
Ante esta situación, din, é preciso "facer visible a unidade de actuación das tres universidades do sistema universitario de Galicia. Primeiro, no rexeitamento común destas medidas. En segundo lugar na aplicación homoxénea do axuste retributivo". Explican que a lei "é de obrigado cumprimento para as institucións públicas, e para as universidades en particular". Porén, as tres universidades lembran que "todas leis deben cumprirse", tamén "aquelas que garanten a igualdade de oportunidades e as que encomendan aos poderes públicos a defensa do acceso á cultura e a promoción da ciencia en beneficio da sociedade. As medidas emanadas de conxunturas orzamentarias non deberían ir en contra destas normas fundamentais sobre as que existe un consenso social".
