Dinahosting, a empresa galega de dominios e hosting web, vén de publicar os seus datos correspondentes ao pasado ano, nos que mantivo un crecemento sostido da súa actividade e das súas cifras de negocio. En concreto, ao longo de 2013, a súa facturación creceu case un 15% (14,37%) con respecto ao ano anterior, superando os 10,6 millóns de euros. Estes datos confírmana como empresa líder independente do sector de dominios e hosting web en España.
A empresa, radicada en Santiago de Compostela e fundada en 2001, mantén o seu crecemento en todos os seus produtos: 231.592 nomes de dominio (+ 16,97%), 90.025 plans de aloxamento web (+ 20,62%), 1.366 VPS (+ 20,67%), 1.851 servidores dedicados (+ 12,45%) para un total de 101.587 clientes.
Ao longo de 2013, a súa facturación creceu case un 15% (14,37%) con respecto ao ano anterior, superando os 10,6 millóns de euros
Os seus responsables destacan que os sinais de identidade da empresa son "unha coidada atención a clientes e a plena independencia tecnolóxica baseada no desenvolvemento propio". En palabras de Belén Potel, directora financeira de Dinahosting "nun contexto económico como o actual son uns datos moi satisfactorios que nos permiten afrontar con gran optimismo o novo exercicio". Afirma tamén que "o desenvolvemento e crecemento de dinahosting desde o seu inicio aséntase en dúas premisas fundamentais: a confianza na tecnoloxía propia e o desenvolvemento de solucións sempre desde a perspectiva e necesidades da persoa usuaria" polo que a compañía continuará apostando por estes dous alicerces que constitúen o motor do seu éxito.
Dinahosting conta coa acreditación de organismos internacionais como ICANN ou RIPE así como o recoñecemento por parte de Microsoft como mellor Service Provider no último ano. Isto vén certificar o seu compromiso coa calidade e a fiabilidade dos servizos que fornece á súa clientela. Con respecto á estratexia para o 2014, Dinahosting considera prioritario "centrar os esforzos en dispor dunha atención a clientes que destaca entre as demais empresas do sector, continuar o seu investimento para mellorar a tecnoloxía e tamén seguir conformando e mellorando un equipo de traballo que é o seu mellor activo". En canto a política laboral, a empresa continúa tendo no seu cadro de persoal "un dos seus activos máis destacábeis", xerando emprego estábel nun contexto de crise económica, coa contratación de novos e novas profesionais, actualmente o número de persoas empregadas pola compañía sitúase en 84.