San Xoán de Río acollerá este verán un campamento espacial para nenos e nenas no Albergue dos Biocos. O Space Camp é un campamento de verán que aúna ciencia, astronomía e aventura. Inclúe observacións astronómicas, manexo de telescopios, microscopios e do planetario dixital, geocaching (GPS), e o lanzamento de cohetes de auga.
Serán quendas de 13 días cun prezo dende 389 euros IVE incluído, pero os seus organizadores salientan que, "á vista das actuais circunstancias económicas e dos recortes nos campamentos públicos, hai a opción de mandar aos nenos/as só 7 días". Ademais, destacan que o prezo "é moi reducido en comparación co resto da oferta privada galega. De feito, estamos detectando moito interese entre familias de Madrid que están dispostas a traer aos seus fillos ao noso campamento, por ese aforro económico".
O campamento está organizado por Altega - Educación e Lecer, que conta con máis de 15 anos de experiencia no campo do tempo libre e xestionou catro albergues da Dirección Xeral de Xuventude. O responsable do SpaceCamp é Dositeo Veiga, licenciado en Física e astrónomo afeccionado, responsable da sección “últimas noticias” da revista Tribuna de Astronomía, e tradutor diario da web da NASA Astronomical Picture Of the Day en www.apodgalego.com.
