Sexa polo que sexa parece que Vigo se está a converter na cidade galega con maior presenza de zombies. No verán Coruxo acolleu a carreira zombie vs runner, que en todo o Estado só se celebrou ademais en Madrid e Barcelona. E este xoves chega á cidade olivica a Ruta Zombie, organizada por Dolmen Editorial.
Os actos terán lugar na tenda Norma Cómics (fronte ao mercado do Progreso) e terán como prato forte a presenza do autor vigués Darío Vilas, que asinará exemplares de Instinto de superviviente e Antología Z Vol. 6. Ademais, os asistentes poderán participar en diversas actividades vinculadas coa temática Z, e aqueles que asistan disfrazados levarán un agasallo. Por último, seleccionarase un disfrace gañador que poderá optar a un premio a nivel nacional, concedido por Dolmen Editorial. A Ruta Zombie comezou en Madrid o pasado 7 de setembro e xa pasou por Santander, Barcelona e Valencia, e despois de Vigo farao por Albacete, Sevilla e Málaga.
E os afeccionados á temática zombie do norte de Galicia non deben esquecer que o vindeiro sábado 29 se celebrará na Coruña a segunda edición da Freakemacine Zombie Walk, que arrancará no Obelisco e será conducida por Os irmáns siameses zombies (Nelson Quintero e Alberto da Sinda) cara á Fundación Luis Seoane. A xornada culminará cunha gran esta-concerto na praza de Azcárraga coa actuación do grupo barcelonés de psychobilly Motorzombis.
