Aki Kaurismäki gaña a Calpurnia á Mellor Película no OUFF

Kaurismäki nunha edición do Curtocircuito de Santiago, nunha imaxe de arquivo © Tamara de la Fuente

Hemeroteca

O xurado do Ourense Film Festival (OUFF) deu a coñecer este xoves os filmes e profesionais gañadores dos premios internacionais da 28ª edición. A Calpurnia á Mellor Película, o premio grande do festival, foi para Fallen Leaves, de Aki Kaurismäki, unha película sobre o encontro en Helsinki entre unha traballadora de supermercado e un home alcohólico. O director finés -e veciño a metade do ano de Castro Laboreiro (Portugal) achega unha nova comedia dramática no seu máis puro estilo.

La Memoria Infinita, de Maite Alberdi conseguiu o Premio Carlos Velo á mellor Dirección e o Premio Especial do Xurado

Pola súa banda, La Memoria Infinita, de Maite Alberdi conseguiu o Premio Carlos Velo á mellor Dirección e o Premio Especial do Xurado. Trátase dun documental ao redor do alzheimer que consagra a Alberdi como unha das cineastas documentais máis interesantes e sensibles do momento no ámbito internacional, tras o éxito acadado hai tres anos por El agente topo.

Fallen leaves, de Aki Kaurismäki ©

O Premio á Mellor Guion foi para Fancy Dance (Erica Tremblay e Miciana Alise), unha película ao redor dun nativo americano que secuestra a súa neta co obxectivo de manter o legado cultural e familiar., recoñecida "pola particular ollada a unha situación social e persoal entretecendo identidade, resistencia e amor", segundo consta na acta do xurado. A actriz Lily Gladstone foi recoñecida co Premio á Mellor Interpretación por este filme, que comparte cunha mención especual para Lío Mehiel, por Mutt.

O Premio á Mellor Guion foi para Fancy Dance (Erica Tremblay e Miciana Alise)

Na categoría de Mellor Guion Celine Song recibe unha mención especial polo seu debut Past Lives. Recoñecida no ámbito teatral estadounidense, Song asina a súa primera longametraxe sobre o reencontro de dous amigos da infancia cando son adultos. O xurado tamén acordou otorgar unha mención especial á Mellor Fotografía a Ernesto Pardo por El Eco "por rexistrar con sensibilidade o cotiá dunha vila no México profundo".

O xurado internacional estivo composto nesta edición por Estrella Araiza, directora xeral do Festival de Cine de Guadalajara, como presidenta; Almudena Carracedo, representante de CIMA, Inés Branco, directora adxunta do Lisboa Film Festival, e Isabel Blanco, patroa de AISGE en Galicia. A Calpurnia á Mellor película está dotada con 12.000 euros e trofeo (de Manuel Buciños); ademais, os premios OUFF Carlos Velo á mellor dirección, está dotado con 4.000 euros, OUFF Especial do Xurado, con 3.000 euros, e OUFF á mellor interpretación e mellor guión, dotados tamén con 3.000 euros cada un deles.

Despece

  • Iván Villarmea, Juan Ares, Manuel Iglesias e Miguel Casaseca gañaron os Premios María Luz Morales de ensaio sobre o audiovisual

    Gañadores dos VII Premios María Luz Morales © AVG

    Iván Villarmea, Juan Ares, Manuel Iglesias e Miguel Casaseca gañaron os Premios María Luz Morales de ensaio e videoensaio sobre o audiovisual e Víctor López recibiu un accésit

    Por outra banda, Ourense foi tamén o escenario no que a Academia Galega do Audiovisual deu a coñecer hoxe os nomes dos gañadores da VII edición dos Premios María Luz Morales de ensaio e videoensaio sobre o audiovisual. Trátase de Iván Villarmea, Juan Ares, Manuel Iglesias e Miguel Casaseca e Víctor López, quen recibiu un accésit.

    No acto, que tivo lugar no Centro Cultural Marcos Valcárcel, estiveron presentes representantes da Academia Galega do Audiovisual, entidade encargada de organizar os premios e das catro deputacións provinciais, que apoian o certame.

    Na categoría de Mellor ensaio escrito sobre o audiovisual galego a obra gañadora foi O campo de atrás: paisaxes rururbanas no cinema galego, de Iván Villarmea Álvarez, “por abordar unha cuestión clave pero relativamente marxinal no audiovisual galego, a través dun enfoque singular e apoiándose nun corpo de análise coherente que combina cinema e xeografía. O xurado destaca especialmente a súa precisión e estilo, a diversidade, pertinencia e orixinalidade das fontes e a calidade global do texto".

    O galardón ao Mellor ensaio escrito sobre audiovisual internacional foi para Glitch: A arte do accidente. Ontoloxía e evolución, de Manuel Iglesias Vila “pola súa necesaria contribución ao estudo dun concepto marcadamente contemporáneo e pouco tratado en Galicia, feita cunha documentación e un desenvolvemento rigorosos. Nesta categoría tamén se outorgou un accésit a Hipercinema: Queimar ós ollos, romper ós oídos / Revolucionar o mundo, de Víctor López, “pola capacidade para a elección e execución de opcións formais non normativas e pola orixinalidade dos desprazamentos intelectuais propostos".

    O xurado recoñeceu como Mellor videoensaio sobre o audiovisual galego o traballo Os espazos do cinema, de Miguel Casaseca, por “ofrecer unha reflexión pertinente que apela á experiencia colectiva dende o persoal, explorando o impacto do espazo e do medio na relación que establecemos co cinema, a través dunha forma que remite á esencia do ensaio audiovisual clásico subliñando a importancia da subxectividade e as posibilidades da  montaxe".

    Os premios, que naceron no ano 2017 para impulsar a produción de ensaio e videoensaio en lingua galega, están dotados con 1.200 euros e un trofeo. Por segundo ano, grazas á colaboración entre a Academia e A Cuarta Parede, os traballos premiados publicaranse na revista de crítica cinematográfica. Os galardóns renden homenaxe a María Luz Morales (A Coruña, 1889 - Barcelona, 1980) destacada escritora e xornalista, foi unha das primeiras mulleres en España en ser directora dun diario (La Vanguardia).

    Nesta edición, o xurado estivo composto por Jesús Silva, director da revista de crítica literaria A Cuarta Parede, a docente da Universidade de Vigo Diana Ramahí e o docente da Universidade de Santiago de Compostela Cibrán Tenreiro, quen asistiu á entrega de premios e foi o encargado de anunciar os traballos gañadores.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza