Varios cidadáns concentráronse esta mañá na Fundación Luís Seoane para rexeitar a destitución da súa directora, a ex concelleira socialista Silivia Longueira, e que lle foi comunicada pola edil de Cultura do Concello da Coruña de forma verbal, á espera de que sexa ratificada polo padroado da institución. Ademais, propietarios de coleccións privadas que compoñen a exposición que actualmente se pode ver no museo decidiron retirar as súas obras en forma de protesta.

Así, Francisco Pillado acudiu nesta mañá de mércores á Fundación para retirar dous dos cadros da súa propiedade, obras do propio Luís Seoane, que formaban parte da exposición e que xa non se atopan nas paredes do edificio dedicado ao artista na Coruña, que xunta desde o pasado mes de abril varios lenzos cedidos por 22 prestadores particulares. As obras -unha sen título e outra denominada Sorpresa- foron descolgadas da parede polo propio Pillado, que lembrou que eran "un agasallo persoal" do autor e aclarou que facía este xesto "como protesta" pola marcha de Longueira.

"Non me gusta o que fixeron; non coñezo os motivos da destitución, pero non me estraña se a idea parte do Concello da Coruña", di Pillado

"Tiña que retirar os cadros porque non me gustou o que fixeron. Non coñezo os motivos [da destitución de Silvia Longueira] pero non me estraña nada se a decisión chega desde o Concello da Coruña, que semella ter outras prioridades como Millán Astray. Non lles preocupa Luís Seoane, que está nas antípodas ideolóxicas de quen está na Administración local", asegurou Pillado.

Mentres, a aínda directora da Fundación non quixo entrar en polémicas e limitouse a asegurar que cumpriu coa petición dos propietarios das obras e que ela só é "unha humilde traballadora". Outro artista, Lino Braxe, tamén anunciou a súa intención de retirar catro obras da súa propiedade cedidas ao museo, aínda que a responsable prefire agardar a que sexa el mesmo quen solicite de maneira formal a retirada dos cadros e que envía unha persoa para o que faga ante os problemas de mobilidade do actor e escritor.

Silvia Longueira deixará a dirección da Fundación Luís Seoane, segundo decidiu a concelleira de Cultura, Ana Fernández, que lle comunicou que a destituiría. Desde o Concello asegúrase que esta decisión só vén provocada pola intención de darlle "unha nova velocidae" á institución e negan que haxa motivos ideolóxicos detrás. No entanto, iso non é o que pensan voces achegadas á aínda directora, que ven neste cesamento das súas funcións unha "persecución" da que fora concelleira socialista no anterior goberno municipal, razón pola que solicitara unha excedencia de tres anos á fronte do museo.

Actualmente, a Fundación conta con obradoiros de 35 artistas da cidade, outro sobre o universo de Luís Seoane a través da lingua de signos, e cursos de arte contemporáneo e arquitectura, entre outros.