Entre os moitos xogos que encherán o día están os birlos, a chave, a billarda, a ra, os aros, as chapas, o truco, as carreiras de sacos, o tiro de corda ou a billarda
A vila portuguesa de Melgaço acolleu este venres 24 de maio a oitava edición Xornada de Xogo Tradicional galego e portugués, un evento organizado pola Asociación Cultural e Pedagóxica Ponte…nas ondas! co apoio da Câmara Municipal de Melgaço. Ás múltiples actividades estaban convocados centos e centos rapaces e rapazas dunha decena de centros de ensino de Galicia e Portugal chamados a "convivir e seren protagonistas dunha completa xornada de lecer que recrea experiencias e brinquedos" que, destaca a organización, "lonxe de desaparecer, amosan o seu imperecedoiro potencial lúdico e didáctico".
Entre os moitos xogos do día estiveron os birlos, a chave, a billarda, a ra, os aros, as chapas, o truco, as carreiras de sacos, o tiro de corda ou a billarda. A Xornada, dende o seu nacemento, busca potenciar todos estes xogos, algúns "que estaban a caer en desuso e que agora atopan o seu espazo nas aulas" e outros, como é o caso da billarda, "que mesmo viven un exitoso renacer social nos últimos anos".
Moitos dos xogos e brinquedos son clara mostra do patrimonio inmaterial galego-portugués
As actividades comezaron ás 10 horas e chegaron ata as cinco da tardena Área de Estagios e de Lezer de Melgaço. Colaboraron na xornada uns 58 adultos e 25 monitores procedentes do Curso de Técnicos de Desporto da Formación Profesional da Escola Profissional do Alto Minho Interior (EPRAMI).
O interese polos xogos tradicionais gaña interese ano a ano, impulsado polo esforzo de moitos e moitas docentes
O interese polos xogos tradicionais gaña interese ano a ano, impulsado por actividades como as da Rede Galega do Xogo Tradicional e polo esforzo de moitos e moitas docentes que confían nos valores de diversión e pedagoxía que lle ofrecen á comunidade educativa estes encontros lúdicos e non competitivos.
Moitos dos xogos e brinquedos son clara mostra, ademais, do patrimonio inmaterial galego-portugués, sendo explicados e interpretados a partir do seu nexo común, alén das diferentes variedades xeográficas que en moitos casos existen, como é por exemplo o caso da chave ou dos birlos.
Na web de Ponte…nas ondas! pode afondarse nos xogos tradicionais a través de diferentes actividades interactivas dispoñibles libremente para a súa descarga e o seu uso nos fogares e tamén nas aulas.
