Tras o éxito da súa primeira xira, o espectáculo musical infantil producido por Ainé fai parada no Culturgal e, nas vindeiras semanas, en Vilagarcía, A Coruña e Vigo
Hai agora un ano as nenas e nenos comezaron a coñecer Bibopalula. A primeira serie musical de animación en galego puxo o foco nas fillas e fillos da Xeración Xabarín levou á plataforma dixital de contidos infantís da Galega as aventuras e as cancións da Banda do Bosque, que poucos meses despois deu o salto aos teatros cun ambicioso espectáculo.
Tras o éxito da súa primeira xira, que culminaba o pasado verán cunha parada moi especial no festival Castelo Conta, a produción de Ainé está a piques de lanzar a súa segunda temporada. Os paxariños de Bibopalula van voar cara aos teatros polo Nadal pero antes, xa esta vindeira fin de semana, vanse pousar no Culturgal.
Con funcións deseñadas para crianzas de entre 2 e 6 anos, a nova xeira de Bibopalula - O espectáculo comeza en Pontevedra este domingo, día 30, no Pazo da Cultura. Xa ás portas do inverno e do Nadal, o 20 de decembro, a Banda do Bosque porá rumbo ao Auditorio Municipal de Vilagarcía.
Lidia Veiga vólvese meter na pel de Ava, a observadora de paxaros que guía as nenas e nenos polas aventuras da Banda do Bosque ao son de doce cancións orixinais
Tamén chegarán os paxariños ás dúas principais cidades do país. Será o día 28 no Palexco da Coruña e xa en 2026, o 2 de xaneiro, no Teatro Afundación de Vigo. As entradas para todas as funcións xa están á venda a través do web oficial de Bibopalula.
Como no seu comezo, o espectáculo de Bibopalula está dirixido por Marta Lado. Lidia Veiga vólvese meter na pel de Ava, unha observadora de paxaros moi especial que guía as nenas e nenos polos segredos do bosque, a importancia de coidar a natureza, os fenómenos meteorolóxicos ou a vida que medra entre as árbores. Tamén polas aventuras dos paxariños, claro. Robin, Carpin, Pegui e Merli, interpretados por Cristina Andrade, Graciela Carlos, Sara Ferro e Nerea Rodríguez, teñen unha misión que cumprir seguindo as indicacións do sabio señor Moucho.
As nenas e nenos que se acheguen á xira de inverno de Bibopalula atoparán no espectáculo doce cancións orixinais da produción, ben recoñecibles tanto se viron a serie como se escoitaron as súas músicas ou asistiron á primeira temporada da montaxe.
