Uns mozos en paro comezan un proxecto de camiñar 2833 quilómetros, da Guarda a Barcelona pasando por Ourense, Oviedo, Bilbao, Sevilla, Murcia e Barcelona, sen cartos e gravando un docu-reality web. Na viaxe participarán tres persoas: David Correa e Txetxu González, que serán os protagonistas, e Alejo Rodríguez, que se encargará de gravar.
O obxectivo de Hay que Andar é interactuar coas persoas que vaian atopando no camiño, participar nas actividades propias de cada lugar e sobrevivir e desprazarse sen cartos, "buscando alternativas á moeda".
Todos eles veñen de licenciarse en Comunicación Audiovisual e para poñer en marcha este proxecto, que produce Caxato Films, buscan financiamento a través do crowdfunding. Contan ademais co apoio do Concello da Guarda e da empresa de roupa deportiva Zico. Queren conseguir mil euros en 24 días e aceptan achegas a partir de 1 euro, o que dá dereito a aparecer nos títulos de crédito. Por 5 euros pódese ter un DVD co programa completo e partir de 10 euros calquera persoa poderá aparecer no docu-reality "cando pasemos pola túa cidade".
