"Ti decides onde, cando e con quen". Con este lema preséntase En Tránsito, unha plataforma que ofrece levar a cultura a domicilio (a unha vivenda, a un lugar de traballo), achegando "a arte á vida cotidiá das persoas a través de intervención artísticas". É unha iniciativa da xestora cultural Natalia Balseiro, da artista Mercedes Peón e do tecnólogo Fernando Jiménez, na que xa colaboran 14 artistas ou agrupacións. Entre eles La Macana (danza contemporánea), Janet Novás (danza contemporánea), Alejandra Aguirre (artes visuais e creación audiovisual), Yolanda Castaño (obradoiro de poesía), Monica Alonso (cápsulas TI), Mónica de Nut (performance), Xurxo Fernandez e Ytzjak de Oliveira (viaxe sonora culinaria), 2uS (intervencións sonoras), Anta Arquitectos (obradoiro infantil), Regina Fiz (performance) ou os proxectos de hortos domésticos ou mobilidade urbana de Yes I can-tree.

Trátase, en definitiva, de achegar a arte ao lugar no que está o público, e de significar a través destas intervencións un determinado evento persoal, familiar ou profesional. Con estas propostas, que ademais necesariamente son distintas cada vez que se executan (adaptadas ao contexto), ráchase a homoxeneidade da oferta cultural e dos espazos de cultura.

En Tránsito non só ofrece un menú artístico pechado, senón tamén propostas artísticas adaptables, "experiencias artísticas que se adaptan aos teus desexos e que deseñamos conxuntamente a partir das túas preferencias". E mesmo existe a posibilidade de deseñar, man a man con algún dos artistas colaboradores, unha idea nova, unha experiencia artística pensada especialmente para un público e un espazo. As intervencións teñen prezos que se sitúan entre os 300 e os 600 euros e na páxina pódese consultar nun calendario a dispoñibilidade de datas de todas as artistas. Algunhas das propostas están deseñadas para un número máximo ou mínimo de espectadores, como tamén se fai constar na web.