DasKapital prepara a saída do seu novo álbum, Grecia, un título en absoluto casual. Será a continuación de Ruido Negro, unha das alfaias da música galega nos últimos anos para a crítica. Para a súa publicación, iniciaron hai unhas semanas unha campaña de crowdfunding co obxectivo de reunir 1.600 euros que paguen a gravación e edición do disco. Mentres, esta banda de orixes heteroxéneas e resultado denso e punzante, segue embarcada na posta en marcha doutros proxectos, coma a plataforma de edición Discos da Máquina. Como afirman na presentación da campaña, "Das Kapital repite o seu chamado a decidir entre socialismo e barbarie, entre o ruído negro e a violencia estrutural, entre a aventura e isto. Retirados aos cuarteis de inverno, diagraman a estratexia para unha nova incursión en forma de disco".
Se alguén está interesado en contribuír ao novo disco da banda, debe escribir un correo electrónico ao enderezo daskapital48@gmail.com, indicando no asunto Grecia. Como en toda campaña de crowdfunding ofrécense compensacións para as achegas económicas. Dende o propio cedé coa posibilidade de que o nome do contribuínte apareza no traballo como colaborador por unha achega de 12 euros até recompensas máis gorentosas. Un disco en vinilo de Ruído Negro e un cedé de Grecia por 25 euros ou por 30 euros todo isto máis dous temas extra exclusivos –inédito e rareza- en formato mp3 e un deuvedé cos videoclips da banda 15 días antes da saída oficial de Grecia.
"Esta iniciativa para sufragar a edición de Grecia permitiunos comprobar que si, que hai alguén do outro lado e que, ademais, están dispostos a se comprometer co proxecto de Das Kapital"
Como vai a campaña de crowfunding?
Pois a verdade é que está funcionando ben. A resposta e a xenerosidade da xente está sendo emocionante. Nunca sabes se hai alguén do outro lado, e esta iniciativa para sufragar a edición de Grecia –así se vai titular o disco- permitiunos comprobar que si, que hai alguén do outro lado e que, ademais, están dispostos a se comprometer co proxecto de Das Kapital. A primeiros do mes que vén entraremos no estudio e agardamos que o traballo estea na rúa a comezos de marzo.
Como vai ser Grecia -disco-?
Non melódico. Violento. Anti pop. Sonoramente rigoroso. Revoltado. Como dixo un bo amigo, espartaquista.
Que aprendestes en Ruído Negro?
Que non estamos sos.
"Talvez nós poidamos ler o futuro inmediato na loita de clases que se desenvolve, arestora, en Grecia"
Que temos que aprender de Grecia -país-?
Grecia é unha premonición. Ao poeta turco Nazim Hikmet gustáballe ler o futuro nos pousos do café. Talvez nós poidamos ler o futuro inmediato na loita de clases que se desenvolve, arestora, en Grecia.
Derrubaremos o capitalismo a base de bourar?
Derrubaremos o capitalismo? En calquera caso, é o capitalismo o que nos está a derrubar a nós. Defendámonos.
"É o capitalismo o que nos está a derrubar a nós. Defendámonos"
Que estades escoitando ultimamente?
José Afonso, Cut Hands, Golpes Bajos, Swans, Neurosis, Los Contentos, a triloxía última de Scott Walker (Tilt, The Drift, Bish Bosch), Pogues, Ataque Escampe, a etapa de Coltrane posterior a Ascension, Gonjasufi, Militia, Silent Servant, Third Eye Foundation, Ben Frost, discos en directo dos Doors, Atahualpa Yupanqui, God, Telephone Rouges...
Que vos gusta da música galega?
Bertolt Brecht, Rosa Luxemburgo e Pier Paolo Pasolini.
A que canción lles tedes especiais ganas para facer unha versión?
Senhora do Almortao, unha canción popular da Beira-Baixa portuguesa que gravou José Afonso.
En que lugar vos faría especial gracia facer un concerto sorpresa?
No Bundesbank.