Dentro da programación de Viñetas desde o Atlántico, a Asociación Galega de Profesionais da Ilustración (AGPI) organiza este xoves o seu primeiro Combate de Debuxantes. Alberto Vázquez, Diego Blanco, Alberto Guitián, Nas!, Nómada, Luis Sendón, Ghosttthead e Xurxo G. Penalta enfrontaranse ás 21 horas en The Room, na zona vella da Coruña.
Trátase dun evento lúdico en que oito contendentes se enfrontarán ilustrando en gran formato e en tempo limitado conceptos ao azar. Será o público asistente o que terá o poder de decisión para elixir, mediante votación, o gañador de cada contenda. Os participantes serán Alberto Vázquez, Diego Blanco, Alberto Guitián, Nas!, Nómada, Luis Sendón, Ghosttthead e Xurxo G. Penalta. Só pode quedar un deles, que se fará co premio especial e o Cinto de Campión desta primeira edición do Combate de Debuxantes.
Todo isto complementarase cunha exposición con obras dos contendentes, catering de petiscos, sorteos, música, un presentador de luxo e moitas sorpresas máis. A entrada é libre e gratuíta, aberta a todo o público interesado.
Este mércores no Viñetas
David Aja, debuxante español que triunfa no competitivo mercado americano e con dous Premios Eisner recentemente recibidos no seu haber, e Susanna Martín, autora de Sonrisas de Bombai, unha das obras que sorprendeu a público e crítica na última tempada, serán este mércores os protagonistas das dúas charlas-coloquio de Viñetas desde o Atlántico. Susanna Martín departirá a partir 18.15 horas cos afeccionados que queiran achegarse ao salón de actos do Quiosco Alfonso, sede central do festival. Aja farao a partir das 19.45, no mesmo lugar.
Outra proposta de Viñetas para os afeccionados é poder ver traballando, en vivo e en directo, a Jacobo Fernández, quen continuará pintando, ao longo do día, o seu mural da rúa Pontejos (á beira do quiosco de prensa).
