Hai ano e medio, en abril de 2012, inaugurábase en Corme o Museo de Arte Contemporánea de Costa da Morte, promovido pola Fundación Torre-Pujales. O acto contou coa presenza do secretario xeral de Cultura, Anxo Lorenzo, e de Cristina Torre Cervigón, viúva do pintor coruñés Julio Pujales e principal impulsora do museo. O espazo, que contaba con obras de Colmeiro, Antonio Saura, Eduardo Arroyo, Laxeiro e a propia colección de Julio Pujales, tivo un custe de máis de 600 mil euros, dos que Cristina Torre Cervigón pagou a metade, para facer realidade o seu soño.
Hoxe, o soño rematou. O museo ten que facer fronte a unha débeda de cen mil euros, produto dunha axuda de 80.000 euros do programa Agader da UE que a fundación debe devolver por non ter rematado as obras do museo no prazo previsto. Para obter liquidez para realizar este pagamento, o vindeiro 21 de novembro haberá unha poxa na que se venderán 47 cadros da colección de Julio Pujales. Se a venda das obras, taxadas nun millón de euros, non achegara unha cantidade suficiente para compensar a débeda, a administración podería expropiar o edificio do museo, situado na rúa Real da vila, e que foi rehabilitado polo arquitecto Carlos Hurtado Casanova.
En calquera caso, a continuidade do museo ante a situación creada, está no aire. A promotora deste espazo de arte aínda está pagando o crédito que solicitou para levar a cabo as obras de construción e o Concello de Ponteceso afirma que non pode facer nada. Lamentan, iso si, a situación creada, que cualifican de "derrota", e salientan a importancia do museo para dar a coñecer Corme e a Costa da Morte fóra de Galicia.
"Corme Porto será o epicentro, porque alí está a sede, pero nacemos cunha ambición de universalidade", destacouse sempre dende a Fundación, que comezou a operar en 2006 coa inauguración do museo como Museo. Tamén salientaron que o centro de arte "é digno de estar en calquera capital, Corme poderá estar orgulloso de ter este Museo. A cultura é o que fai grande a un pobo, e o noso empeño vai neste senso". Dende entón, veu recibindo un número crecente de visitantes (1.200 este verán). Ademais, desenvolveu un sistema de bolsas que permite a creadores de todo o mundo gozar de estadías pagadas na localidade a cambio de doar algunhas das obras realizadas.