O Pop Voyage sería un festival de música máis (ou case) se non fose por unha cousa: os concertos teñen lugar na cuberta dun barco que a noite do 28 de xuño percorrerá a Ría de Arousa durante varias horas. Coma o Love Boat ou o Barco do Amor da famosa serie o mar será o pano de fondo ideal para gozar de cinco concertos que teñen as prazas limitadas.
Niño y Pistola, Músculo!, Cazador, Disco Episcopal e She´s in parties DJ poñerán música a unha festa pop que comezará ás 22 horas do venres 28, cando o barco partirá puntual dende o Porto Deportivo de Vilagarcía de Arousa. Destaca a presenza de Músculo!, semifinalistas do Proxecto Demo 2012, e que presentarán os temas do seu novo EP. Niño y Pistola tamén presentarán o seu disco There's a Man with a Gun Over There (2013 - Ernie Records). O pasado ano o protagonismo correspondeu a Músculo! e Trajano, que encheron a embarcación.
Convocarase os asistentes as 21 horas na zona TIR da localidade para ir embarcando. O festival rematará con unha after-party no clube de Mar (Porto Deportivo) da mesma localidade ata as 5 da madrugada e posteriormente no local Sama Sama.
Esta iniciativa nace coa intención de ofrecer experiencias musicais diferentes ó público galego, e como maneira de hibridar o entorno e a cultura nun evento moi apetecible. A organización remarca que non hai subvencións nin patrocinios detrás do Pop Voyage!, intentando realizar un evento sostible a prezos asequibles para todo o público. Cinco concertos paseo en barco e festa posterior por só 16 euros. Quen dá máis?
As entradas xa están á venda en Compostela (Tenda A Reixa), Vilagarcía de Arousa (Sama Sama), Pontevedra (Vázquez Lescaille Discos), Padrón (Retro.visor) e Valga (A Casa Vella). E tamén no email popvoyageproducciones@gmail.com.