O vindeiro 10 de novembro Idoia Cuesta inaugura en Toquio KIRI, unha mostra individual no Instituto Cervantes coa que a cesteira lle abre camiño á artesanía contemporánea galega no Xapón
Nacida en Euskadi, Idoia Cuesta instalouse hai máis de dúas décadas na Terra Chá, en Outeiro de Rei, onde traballa actualizando a cestaría tradicional galega. O éxito das súas creación levouna a gañar o Premio Nacional de Artesanía 2014 e o Premio Galego de Artesanía 2021, ademais de protagonizar un gran número de exposicións, feiras especializadas e de colaborar con deseñadores e deseñadoras de primeiro nivel.
O vindeiro 10 de novembro Cuesta inaugura en Toquio KIRI, unha mostra individual no Instituto Cervantes coa que a cesteira lle abre camiño á artesanía contemporánea galega no Xapón. A exposición, producida pola cooperativa coruñesa TAKO, tece lazos entre Galicia e Xapón coa artesanía, os materiais e a néboa como centro.
“O título, KIRI, une a néboa dos invernos galegos co outono en que a exposición chega á capital xaponesa. As pezas de Idoia Cuesta, falan do coidado do material e do valor do tempo, e estamos seguros de que o público xaponés sentirá próximas”, destaca o director do Instituto Cervantes en Tokio, Víctor Andresco.
KIRI poderá visitarse de forma gratuíta ata o 19 de novembro no Instituto Cervantes de Toquio
KIRI poderá visitarse de forma gratuíta ata o 19 de novembro no Instituto Cervantes de Toquio. A mostra está formada por catro das últimas coleccións de Idoia Cuesta, así como unha galería de fotos da coruñesa Sandra García Rey, que mostran o proceso de traballo da artesá e a contorna natural no que o desenvolve.
Dende Outeiro de Rei Idoia Cuesta está a revolucionar a cestería tradicional galega. O xurado do Premio Nacional de Artesanía destacou “a súa habilidade de modernizar a tradición cesteira experimentando con materiais e usos que non son propios do oficio, a súa capacidade innovadora e a apertura de novos mercados adaptando pezas tradicionais ás tendencias actuais”. O seu traballo baséase, sempre, en materias primas obtidas da súa contorna: a Reserva da Biosfera Terras do Miño.
Dende Outeiro de Rei Idoia Cuesta está a revolucionar a cestería tradicional galega
Con materiais como madeira de castiñeiro, la e tempo comeza as súas pezas e tecidos sen un patrón predefinido, e deixa que a forma apareza ao final, “como unha paisaxe cando se levanta a néboa”. Así se expresou a artesá na conversación que deu orixe a todo este proxecto, a súa entrevista no videopodcast Da Néboa, dirixido por María Gómez-Domínguez e centrado na artesanía galega contemporánea, no que falou da súa relación coa néboa, tan habitual no seu fogar, e tamén da súa admiración pola cultura xaponesa. Aí plantouse a primeira semente do proxecto que agora desemboca en KIRI (palabra que significa “néboa” en xaponés”).
Con materiais como madeira de castiñeiro, la e tempo comeza as súas pezas e tecidos sen un patrón predefinido, e deixa que a forma apareza ao final, “como unha paisaxe cando se levanta a néboa”
A mostra exporá en Tokio catro coleccións que amosan disversas caras do traballo de Idoia Cuesta: Castanea, Liquen, Cinza e Wool Metamorphosis Dark.
KIRI completa ademais un grande ano 2026 para Idoia Cuesta, no que participou en Venecia na Bienal de Artesanía Contemporánea Homo Faber; desenvolveu unha residencia artística no Festival Contextile de Guimarães, recibiu o premio Mellor Artesá de Vangarda do Círculo Fortuny.
