Ninguén dixo que fose ser doado, pero o guión do partido de hoxe parecía empeñado en que os afeccionados branquivermellos sufrisen minuto a minuto. Prórroga, ocasións falladas, erros tamén nos penaltis, que chegaron até o quinto lanzamento, e aí Manu non fallou. O Lugo é equipo da división de prata do fútbol español, regresa a Segunda vinte anos despois, completando unha gran tempada e sumándose tamén aos éxitos de Dépor, Celta e Ourense. Catro ascensos para un ano para lembrar no fútbol galego.
Lugo pasara toda a fin de semana de festa, vestido de romano ou de castrexo no Arde Lucus, pero as celebracións elevaron o ton a partir das dez menos cinco da noite. Unhas dúas mil persoas viran o partido na praza de Augas Férreas, pero sobre todo o ascenso celebrouse na Fonte do Rei. Unha longa noite despois da noite máis curta do ano. Lugo é de prata.
O Lugo regresa a Segunda vinte anos despois, completando unha gran tempada e sumándose aos éxitos de Dépor, Celta e Ourense
Os ánimos eran bos ao comezo, o 3-1 da ida permitía os xogadores de Quique Setién xogar con tranquilidade, ou así debía ser. Pero o Cádiz comezou o partido moi concentrado, encadenando ocasións, e o Lugo non era quen de manter o balón. E así chegou no minuto 13 o 1-0, obra do ourensán Ferreiro. Parecía máis preto o 2-0 que o empate, pero no minuto 28 Isma colleu o balón no centro do campo e vestiuse de Xavi ou Messi para deixar só ao arxentino Claudio Monti fronte ao porteiro do Cádiz. 1-1 e o Lugo tranquilizábase.
Pero no minuto 45 Pita cometeu un penalti completamente innecesario sobre Góngora. Porén, Escalona comezou nese momento a vestirse de heroe, detendo o lanzamento. O Lugo estaba a 45 minutos do ascenso, superando a presión dun Ramón de Carranza ateigado e dos ataques lanzados ao longo da semana polo adestrador gaditano e os medios de comunicación da cidade.
Con todo, non ía ser tan doado. Aos trinta segundos da reanudación Dioni marcou o 2-1 e quince minutos despois, ante un Lugo noqueado, Juanjo facía o 3-1 e empataba a eliminatoria. Quedaba media hora para xogar nela toda unha tempada. A partir de aí o cansancio e o medo a encaixar o gol comezaron a pasar factura, sobre todo no Cádiz. Puido marcar Ikechi para o Cádiz, pero a ocasión máis clara tívoa Berodia para o Lugo, no 91. Chegou a prórroga, na que os minutos foron pasano moi rápido, cun Cádiz cada vez máis repregado e un Lugo que puido marcar, de novo a través de Berodia, que non tivo o seu día.
Na rolda decisiva Escalona volveu ser o heroe do seu equipo detendo o penalti andaluz, e Manu marcou o 3-2
E chegaron os penaltis. 1-0 para o Cádiz, 1-1, 2-1. E nese momento Belforti fallou. Parecía que o Lugo morría na beira, cando xa rozara o ascenso coa punta dos dedos. Pero Akinsola fallou, e en cambio Luismi marcou o 2-2 para o Lugo. Tamén fallaron Cases e Berodia. E na rolda decisiva Escalona volveu ser o heroe do seu equipo detendo o penalti andaluz, e Manu, a persoa máis tranquila en todo o estadio, marcou o 3-2.
Na rolda de prensa posterior ao partido, o adestrador do equipo lucense, Quique Setién, salientou que o Lugo "é un equipo modesto, pero serio", dedicoulle o ascenso ao presidente da entidade e gabou o seu rival, o Cádiz, de quen dixo que merecía ascender igualmente. Finalmente, sinalou que a partir deste luns decidirá o seu futuro. Asegurou que no tempo que leva no Lugo recibiu varias ofertas, pero el non moveu "un músculo".
