Unha ducia de 'camiños naturais' en Galicia (que non van a Compostela)
Camiños hai moitos, dende as moitas vías que levan a Santiago (ou que parten desta cidade en dirección a Fisterra) aos numerosos itinerarios tradicionais, seguidos dende hai séculos para desprazarse dunhas vilas a outras e que en moitos casos aínda se conservan, como os Camiños Reais ou as antigas vías romanas. O Ministerio de Agricultura conta cunha rede de Camiños Naturais, que suma case unha ducia de exemplos en Galicia.
-
01
Camiño Natural das rutas ecolóxicas do río Catoira
Este camiño percorre as ribeiras dos ríos San Cibrán e Catoira, neste concello pontevedrés, con dous itinerarios que suman seis quilómetros de lonxitude
-
02
Camiño Natural das Sendas en Abalo
Tamén en Catoira, este camiño suma catro rutas (Senda do Camiño Real, Senda de Souto da Vila, Senda dos Muíños de Vento de Abalo e Senda do Río Freixeiro)
-
03
Camiño Natural dos Arrieiros
O Camiño parte de Fonteantiga, no Carballiño, rematando no lugar de San Fiz do Varón, e suma un total de 14,2 quilómetros. A ruta, circular, pasa por carballeiras e bosques de ribeira.
-
04
Camiño Natural da Ribeira Sacra
O Camiño Natural da Ribeira Sacra inclúe cinco rutas, unha delas de 24 quilómetros (Mosteiro de Santo Estevo e ermida Virxe do Monte), outra de 8 quilómetros (de Parada de Sil ao Mosteiro de Santa Cristina) e outras tres máis curtas, percorrendo espazos nos concellos de Monforte ou Ribas de Sil
-
05
Camiño Natural da Mirada Circular
O Camiño Natural da Mirada Circular é un percorrido lineal de máis de 70 quilómetros de lonxitude que percorre a parte leonesa da Serra dos Ancares, entre Guímara (no límite entre León e Asturias) e Balboa (na fronteira entre León e Galicia)
-
06
Camiño Natural do río Barbantiño
A ruta, de algo máis de 10 quilómetros, percorre as ribeiras do río Barbantiño, nos concellos de Punxín, Maside e Amoeiro, pasando por moitos muíños e espazos de gran beleza.
-
07
Camiño Natural de San Rosendo. De Porto Quintela a Ourense
O Camiño Natural de San Rosendo suma un total de 225 quilómetros entre o sur da provincia de Ourense e a Maríña, no norte de Lugo, percorrendo polo tanto todo o interior de Galicia. Está dividido en tres treitos, dous deles ourensáns (de Porto Quintela a Celanova e de Celanova a Ourense) e leva o nome do nobre e abade galego do século X, que chegou a ser Bispo de Dumio e fundou varios mosteiros, por exemplo en Celanova
-
08
Camiño Natural de San Rosendo. De Mondoñedo a Foz
O Camiño de San Rosendo continúa na Mariña, entre Mondoñedo, Lourenzá, Barreiros e Foz, algo máis de 32 quilómetros pasando por paisaxes moi distintas e finalizando á beira do mar.
-
09
Camiño Natural da Ruta do Cantábrico
No seu final, o Camiño de San Rosendo únese ao Camiño Natural da Ruta do Cantábrico, que percorre a costa lucense ao longo de 150 quilómetros divididos en sete etapas, pasando por Ribadeo, Foz, Burela, San Cibrao, Viveiro, O Vicedo, O Barqueiro ou o Porto de Espasante.
-
10
Camiño Natural de Carballeda de Avia
Este camiño suma algo máis de 18 quilómetros por ese concello da comarca do Ribeiro, pasando por muíños, capelas e subindo ata a Pena Corneira
-
11
Camiño Natural Vía Nova
Este camiño natural recibe o seu nome da Vía XVIII romana, coñecida tamén como Via Nova, que unía Braga e Astorga. Suma tres treitos, entre Portela do Home e Santa Comba de Bande, entre Santa Comba de Bande e A Saínza e entre Biobra e Petín.
-
12
Camiños a Santo André de Teixido
Hai máis camiños tradicionais que non están incluídos na lista de Camiños Naturais do Ministerio. Entre eles destacan os que levan a Santo André de Teixido, un amplo conxunto de rutas entre as que destacan o Camiño Vello, o GR-55 Camiño de Santo André, a Ruta dos Peiraos, o Camiño dos Cantís, o Camiño do Mar, ademais doutras rutas non oficiais.