Unha ducia de colexios aos que volver
O coronavirus está a facer da volta ao colexio deste 2020 un problema para moita xente. Pero hai outros colexios e escolas aos que paga a pena volver e admirar.
-
01Colexio de Fonseca
Este edificio renacentista, sede da Universidade de Santiago de Compostela e mandado construír polo arcebispo Alonso de Fonseca, comezou a funcionar en 1544. [Imaxe: CC-BY-SA Xunta de Galicia]
-
02Colexio de Nosa Señora da Antiga
Tamén coñecido como colexio dos Escolapios, Monforte presume deste edificio de estilo herreriano e do cadro do Greco que alberga. [Imaxe: CC-BY-SA Xunta de Galicia]
-
03Colexio dos irlandeses en Santiago
Irlandeses fuxidos da persecución política e relixiosa que había no seu país asentáronse en Santiago e levantaron este edificio como centro de formación da súa comunidade no século XVII na rúa Nova. [Imaxe: Turismo de Santiago]
-
04Colexio de Arquitectos en Vigo
A sede viguesa dos profesionais da arquitectura é outro tipo de 'colexio', neste caso inaugurado en 2009 e obra de Jesús Irisarri e Guadalupe Piñera. [Imaxe: Google]
-
05Escola de Artes e Oficios de Vigo
Do arquitecto Michel Pacewicz, José García Barbón cedeu o edificio ao Concello para destinalo á educación de artes e oficios que vén acollendo desde comezos do pasado século. [Imaxe: Concello de Vigo]
-
06Escola de Altos Estudos Musicais de Santiago
No interior do parque da denominada Finca Simeón, na zona de Vista Alegre, o edificio foi deseñado por Antón García Abril hai dúas décadas. [Imaxe: Concello de Santiago]
-
07Casa-Escola de Moeche
O Consello da Cultura Galega, a través do Arquivo da Emigración Galega, desenvolveu e ten activo en internet o proxecto 'As escolas da emigración' , no que recompila ese tipo de proxectos impulsados polos indianos. Repasamos a partir deste punto varias delas, como esta Casa-Escola de Moeche, inaugurada en 1920 e hoxe en ruínas. [Imaxe: Consello da Cultura Galega, Arquivo da Emigración Galega]
-
08Grupo escolar Unión Mugardesa
Impulsado pola sociedade habaneira Unión Mugardesa, o edificio foi derrubado en 1973 e no seu lugar foi edificado un novo instituto. [Imaxe: Consello da Cultura Galega, Arquivo da Emigración Galega]
-
09Escolas Municipais Jesús García Naveira
Legado dun dos irmáns García Naveira que tantas edificacións salientables deixaron en Betanzos, esta levantada en 1918 seguiu a ser un centro educativo. [Imaxe: Consello da Cultura Galega, Arquivo da Emigración Galega]
-
10Escolas 'Sada y sus contornos'
Inaugurado en 1927, durante a Guerra Civil o edificio foi incautado e destinouse a acuartelamento militar e para aloxar os efectivos da Garda Civil cando Franco visitaba o pazo de Meirás. [Imaxe: Consello da Cultura Galega, Arquivo da Emigración Galega]
-
11Escolas Pro-Valle Miñor
Impulsado pola Unión Hispano-Americana Valle Miñor e inaugurado en 1914, o edificio segue a ser un instituto de educación secundaria. [Imaxe: Consello da Cultura Galega, Arquivo da Emigración Galega]
-
12Escola de nenas de Cee
Inaugurado en 1887, o edificio levantouse en terreos do seu impulsor, Fernando Blanco de Lema, filántropo e promotor da escola. [Imaxe: Consello da Cultura Galega, Arquivo da Emigración Galega]