Unha ducia de fitos do Igadi no seu 30 aniversario
O Instituto Galego de Análise e Documentación Internacional (Igadi) constituíuse o 10 de setembro de 1991 en Baiona por iniciativa de Xulio Ríos. O Consello da Cultura Galega acolle este 1 de outubro un acto polo seu 30 aniversario. Facemos repaso a unha ducia de fitos da súa historia.
-
01Tempo Exterior
A revista de análise e estudos internacionais que impulsou o Igadi, de periodicidade semestral, é unha referencia estatal como publicación especializada no sector. E en galego.
-
02Fondo Galego de Cooperación
O Igadi promoveu que os concellos galegos puxesen en común os cartos que destinaban por separado a cooperación internacional para facelos máis eficientes e potenciar a solidariedade municipalista. En 1997 naceu o Fondo Galego de Cooperación e Solidariedade con dez concellos adheridos e hoxe son máis dun cento as administracións locais galegas incorporadas.
-
03Fundación Plácido Castro
A fundación que lembra e pon en valor a figura do polifacético responsable de relacións internacionais do Partido Galeguista, tradutor ou xornalista impulsor do galego na BBC é outra das iniciativas nacidas do Igadi.
-
04Libro Branco da Acción Exterior
En 2004 o Igadi elaborou por encargo da Xunta o Libro Branco da Acción Exterior, chamado a ser a folla de ruta de Galicia nese eido. Como ‘think tank’ vén facendo contribucións de todo tipo ás reflexións que todo tipo de institucións políticas, económicas ou sociais abren sobre a acción exterior galega.
-
05Observatorio de Política China
Froito da especialización de Xulio Ríos en China naceu esta iniciativa en asociación con Casa Asia para analizar a evolución do xigante asiático.
-
06CIDIC
O Centro de Información e Documentación Internacional Contemporánea é a gran biblioteca de publicacións especializadas no eido das relacións internacionais con que conta o Igadi. Está na súa actual sede en Pontevedra.
-
07Texturas Internacionais
Ademais da revista periódica Tempo Exterior, o Igadi impulsa diversas publicacións monográficas sobre todo tipo de temas, a maioría delas incluídas dentro da colección Texturas Internacionais.
-
08Congreso, conferencias, mesas redondas...
O labor de información e concienciación do Igadi vénse plasmando en todo tipo de actos académicos ou divulgativos.
-
09Nós no mundo
Os informes periódicos sobre a acción exterior galega, ou sobre os principais acontecementos internacionais queren ratificar que “en Galicia temos opinión do mundo”.
-
10Estudantes de prácticas e profesorado visitante
Polo Igadi pasaron ducias de estudantes de prácticas e profesorado visitante que contribuíu a dar a coñecer no mundo a acción exterior de Galicia.
-
11O lema
A razón de ser do Igadi está expresada no seu lema...
-
12As persoas
...pero o Igadi só é posible polas persoas. Porque Xulio Ríos turrou del durante máis de dúas décadas e media, ata que pasou a ocupar a súa presidencia de honra e deixou a dirección nos últimos anos en mans de Daniel González Palau.