Marcos Pérez Pena

Unha ducia de Grandes momentos da televisión en Galicia

Levamos máis de 40 anos de televisión en Galicia. O Centro Territorial de TVE comezou as súas emisións o 25 de xullo de 1971 e catorce anos despois arrancaba a TVG. Dende entón estas dúas cadeas, e máis adiante as canles locais e a TDT, veñen rexistrando a memoria visual de Galicia, ademais de ofrecernos algúns imaxinarios e referentes culturais compartidos por todos os galegos e galegas. De Gayoso ao Xabarín, pasando por Galicia Sitio Distinto ou Tareixa Navaza. Do enterro de Castelao e as tetiñas free a Nunca Máis.

  1. 01

    Nunca Máis no Luar

    O Prestige acababa de afundir e o chapapote estaba chegando á costa. Un grupo de persoas interveu durante uns segundos o Luar para pedir a dimisión do Goberno. Un momento que Gayoso sinala como "un dos máis gratos" da súa carreira.

  2. 02

    John Balan, o home orquestra

    A televisión galega nos oitenta tería medios escasos, pero moita imaxinación e espazos e momentos realmente sorprendentes. Como eran aqueles nos que aparecía John Balan, que chegou a ter un sketch propio no show Adiviña quen vén esta noite. Manuel Outeda faleceu en 2008.

  3. 03

    Enterro de Castelao en Bonaval

    Aínda impresiona ver as imaxes dos incidentes que se produciron ás portas do Panteón de Galegos Ilustres o 28 de xuño de 1984. E escoitar a Tareixa Navaza, que continuou narrando as imaxes (que non se cortaron en ningún momento, por orde de Alexandre Cribeiro, que perdeu por este motivo o seu cargo de director de TVG-G). Durante a retransmisión o poeta Uxío Novoneyra abriu a porta da unidade móbil de TVE e deulle a Tareixa un artigo que levaba para publicar en prensa para que o lera en primicia no directo.

  4. 04

    Sue Ellen non estaba mala

    Había que falar de Sue Ellen e de Dallas e desa frase: "Estás bébeda, Sue Ellen", que se converteu nun símbolo das dobraxes da galega, ás veces empregado cun sentido pexorativo. E logo por que non podía falar en galego un multimillonario empresario do petróleo?

  5. 05

    Un sitio moi distinto

    Botamos de menos Galicia Sitio Distinto, miramos eses vídeos e vemos un país moderno, creativo, que se arriscaba, que inventaba. O programa, creado e dirixido por Antón Reixa, emitiuse entre 1990 e 1991, e por aí andaban tamén Carlos Blanco, Xurxo Souto, Rodrigo Roel, Cid Cabido ou Bernabé Ndongo. Música, entrevistas e coches de choque e grandes momentos, coma unha entrevista que en 1991 Reixa lle fixo a un camioneiro de Valverde do Fresno, en Cáceres, que si, falaba galego, coma todos naquel val do norte de Estremadura.

  6. 06

    Tetiñas Free

    Hai case trinta anos TVE recolleu a tensión que en Baroña e noutras praias se viviu entre algúns veciños, encabezados polo crego local, e grupos de nudistas, encabezados por Miguel Cancio ou Pedro Arias, nun movemento que denominaron Tetiñas Free.

  7. 07

    Moita kaña

    No ano 2000 moitos descubrimos o Leo i Arremecághona nunha actuación no Que Serán! de Paco Lodeiro e Xosé Manuel Pereiro. Vestido de faralaes e cunha personalidade escindida entre a copla andaluza e o rock combativo.

  8. 08

    Bombeiros moi ben dotados

    Nas televisións locais tamén se atopan grandes momentos televisivos, como estas imaxes de Telecoruña nas que o daquela concelleiro municipal Carlos González Garcés non pode deixar de rir, despois de falar da "dotación" do corpo de bombeiros.

  9. 09

    "Se ponían voluntarias"

    Quen non imitou algunha vez a José Tojeiro? Quen non dixo aquilo de "Me echaron droga en el colacao"?. Este home de Cariño converteuse moi ao seu pesar nunha celebridade en youtube.

  10. 10

    As chamadas inoportunas de Gayoso

    Gayoso ten malas experiencias co directo, e sobre todo se chama ao chou a un domicilio de Oleiros ás doce da noite. 

  11. 11

    Os novos

    Os doce capítulos de The Young Ones emitidos a finais dos oitenta na TVG causaron sensación. Tanta que nos anos seguintes ducias de cartas pedíronlle á dirección da CRTVG a súa reposición. Sobre todo despois da vitoria do bipartito en 2005. Así se fixo, iso si, cunha nova dobraxe, debido a un protocolo interno que obriga a gravar de novo as voces das emisións anteriores a 1990.

  12. 12

    Los Enemigos en Galicia

    Os concertos que Los Enemigos ofrecerán, a finais de abril en Vilagarcía e en xuño en Ourense, son un bo momento para recuperar esta reportaxe de TVE-G, con Tuchiño como reporteiro.

  13. 13

    O peche, para Akira Toriyama

    E se falamos de referentes xeracionais, poucos tan importantes como Bola de Dragón, e esta sintonía de apertura que animaba as tardes da Galega e do Xabarín Clube