Unha ducia de mapas históricos de Galicia no arquivo do Museo do Pobo
O Museo do Pobo Galego conta cunha valiosa biblioteca e arquivo documental que pon a disposición de persoas investigadoras e público xeral materiais clave para o estudo da historia de Galicia. Entre eses materiais, o Museo creou unha colección de cartografía que acolle preto de 400 planos dos últimos catro séculos, dos que unha parte importante se pode consultar online. Velaquí unha escolma destes planos.
-
01Mapa do Reino de Galicia. Ao redor de 1600
Mapa realizado en Amberes por Fernando Ojea por encargo do Conde de Lemos ao redor do ano 1600.
-
02Mapa da cornixa cantábrica e norte de Castela. 1652
Este plano francés, de 1652, amosa toda a cornixa cantábrica, entre Galicia e Biscaia, e tamén o León e o norte de Castela.
-
03Mapa do Reino de Galicia. 1696
Fermoso mapa italiano do Reino de Galicia publicado en 1696
-
04Mapa da ría e do porto de Vigo. 1745
Mapa da ría e do porto de Vigo realizado en 1745
-
05Mapa da costa cantábrica e do litoral francés. 1759
Carta náutica francesa, que amosa o litoral entre o norte da Península Ibérica e o sur das Illas Británicas
-
06Mapa do Bispado de Ourense. 1763
Mapa do Bispado de Ourense, publicado en 1763 e realizado por José Cornide e Tomás López.
-
07Mapa do Bispado de Lugo. 1768
Cinco anos máis tarde publicouse o mapa do bispado de Lugo, realizado tamén por Tomás López
-
08Mapa dos reinos de León, Galicia e Asturias. 1773
Mapa francés publicado a finais do seculo XVIII que recolle a xeografía do Reino de León e das "provincias" de Galicia e Asturias.
-
09Mapa do 'Coto do Courel'. 1787
En 1787 Tomás López realizou este mapa do "Coto do Courel" incluíndo as súas "feligresías y pueblos menores".
-
10Plano das Mariñas de Domingo Fontán. 1826
En 1826 Domingo Fontán publicou este plano "do país adxacente ás tres rías da Coruña, Betanzos e Ferrol, chamado 'das Mariñas'". En 1817 iniciara os traballos da súa Carta Xeométrica de Galicia, que non rematou ata 1834 e que aínda tardou 11 anos máis en publicarse, en 1845.
-
11Plano da Ría de Pontevedra coas illas Ons e Onza. 1827
Plano da Ría de Pontevedra coas illas Ons e Onza realizado en 1827
-
12Plano da Ría de Arousa de Domingo Fontán. 1828
Dous anos despois do mapa das Mariñas, Domingo Fontán publicou este plano da Ría de Arousa.
-
13Plano da Ría de Viveiro. 1828
Plano da Ría de Viveiro realizado en 1828
-
14Mapa das principais vías de comunicación por terra. 1831
Este plano, publicado en 1831, recollía os trazados das principais entradas e camiños na Galicia do momento.
-
15Mapa da batalla de Elviña. 1855
Mapa da batalla de Elviña, que tivo lugar en xaneiro de 1809, publicado en 1855