Unha ducia de protagonistas do Arde Lucus 2019
O Arde Lucus chega neste 2019 á súa décima oitava edición. Unha maioría de idade á que a festa romana lucense chega en plena expansión do punto de vista turístico pero, sobre todo, consolidada na propia cidade como unha cita a non perder cada ano. Boa parte do éxito da celebración, impulsada polo Concello de Lugo, pasa pola implicación das asociacións e agrupacións que cada ano devolven o vello bosque sagrado de Lugh ás súas orixes galaicas e romanas.
- 01
A cidade
A orixe d Arde Lucus é a da cidade mesma. No vídeo oficial deste 2019 varias das agrupacións xurdidas en torno á festa son as protagonistas; van aparecendo aos poucos na vida cotiá da cidade abafando un chisco ao protagonista ata que se decata que el tamén ten un aquel romano.
02Cohors III Lucensium
Unha das agrupacións máis emblemáticas da Arde Lucus. Constituíuse en asociación e non só se limita a recrear o pasado romano de Lugo nestas datas. Estudan a presenza romana no noso país, recuperan vestimentas, armaduras e armas e difunden en múltiples lugares a pegada imperial en Galicia. Non é difícil atopalos pola cidade nestes días.
03Trebas Galaicas
Fundada en 2011, esta asociación pon o foco na recuperación e recreación da etapa vivida pola actual cidade de Lugo antes da conquista romana. Asentamentos poboacionais, prácticas culturais, ferramentas, roupas e formas de loita galaica son algúns dos seus puntos de interese (e a festa, claro!). (Imaxe: Jesús Burgo)
04Asemblearias de Lucus Augusti
Esta asociación ten como obxectivo difundir os roles femininos da antiga Roma que acadaron máis poder e repercusión, "dende emperatrices ás primeiras patricias que exerceron a avogacía". Neste Arde Lucus convidan a coñecelas "na residencia de Augusto".
05Civitas Lucensis
Varias familias lucenses formaron esta asociación pensando en achegar a historia da cidade á rapazada. Representan "unha cidade irmandada entre romanos e castrexos, demostrando que ambas culturas poden coexistir en harmonía", explican.
06Garda pretoriana
Esta asociación inspírase na garda persoal dos emperadores e cónsules romanos. Creada para participar activamente no Arde Lucus, achégase tamén a outras celebracións e festas de recreación da época romana.
07Lucus Equites
Un grupo de amigos que quixeron ir alén de achegárense por separado ao Arde Lucus. Comparten interese pola historia e por "recrear a historia da mellor maneira posible" para "divulgar e preservar este legado". O resultado das súas pescudas pódese ver estes días en Lugo nas súas roupas, armas e armaduras.
08Tir Na N'Og
Unha das asociacións máis veteranas do Arde Lucus. Fundada en 2008, recrea o pasado do pobo de Namarino, "unha tribo pre-romana da costa lucense". Queren lograr unha representación máis fiel posible daquel pobo amosando, por exemplo, os seus oficios de preparación de comida e bebida, de fabricación de tecidos e pezas de olaría, de elaboración de redes de pesca ou de forxado metálico. Tamén constrúen embarcacións que xa espertaron interese internacional.
09Senatvs Lvcvs Avgvsti
As sesións do Senado son unha cita obrigada no Arde Lucus. Despois de que, en 2012, o Concello organizase unha actividade teatral para recrear o Senado Romano, en 2013 os membros de Senatvs Lvcvs Avgvsti constituíronse en asociación para participar no Arde Lucus e dar a coñecer a festa e o pasado romano da cidade.
10Salesiani Luci Augusti
Nestes anos a festa do Arde Lucus asentouse con amplitude nos centros educativos da cidade. A comunidade educativa do Colexio Divina Pastora, do barrio da Milagrosa, xunta alumnado, antigos estudantes, as súas familias e persoal do centro para participaren no Arde Lucus cun enorme grupo. O seu símbolo é o nó de Salomón.
11Mercenarios Galaicos
Esta asociación quere amosar que, ao contrario do que puidese pensarse, o pobo galaico non estivo "illado ata a chegada dos romanos". "Nada máis lonxe da realidade, a presenza de valentes e aguerridos" galaicos "nos exércitos de Cartago" é, por exemplo, unha mostra "das antergas conexións mercantís cos fenicios". Están moi presentes nas rúas de Lugo durante a festa.
12Pax Romana Lucus
Unha das asociacións do Arde Lucus de menor dimensión, "pero con afán de medrar" e "Encamiñada a difundir as tarefas e costumes que marcaron a cidadanía" da Pax Romana á Pax Augusta, do ano 27 antes de Cristo ao 180 despois de Cristo. Estudan a organización política, as técnicas arquitectónicas, os costumes de lecer, a vestimenta ou os exércitos.