Unha ducia de webs para seguir aprendendo en galego durante a corentena
Nestes días de traballo na casa para a rapazada, os e as docentes procuran os mellores materiais para o alumnado. Velaquí unha ducia de webs que ofrecen recursos de calidade en galego.
-
01Aulas Galegas
Un portal educativo realizado por un colectivo de profesoras e profesores sen ánimo de lucro para axudar á comunidade educativa a atopar recursos e materiais educativos en galego. Aquí contamos a súa orixe.
-
02Abalar
A web de contidos educativos da Consellería de Educación contén todo tipo de materiais elaborados por docentes. Permite buscar por materia, curso, idioma...
-
03Xabarín
Xabarín, da CRTVG, permite ver os debuxos animados 100% en galego. Ademais de xogos, cancións, audio-contos e actividades. (A APP incorpora un control parental).
-
04Kalandraka
Nesta canle de televisión en liña será posible coñecer os creadores dos libros de Kalandraka e saber máis das súas obras e do seu proceso de traballo.
-
05#DígochoEu
#DígochoEu son tips en formato de video onde se aclaran dúbidas cotiás co propósito de falar e escribir en galego un pouco mellor cada día de 2020. Pódense atopar tanto na web da CRTVG como en Youtube.
-
06Portal da Lingua
No Portal da Lingua Galega hai moitos recursos de todos os niveis. Por exemplo, pequepeixe.gal.
-
07Galicia Encantada
Enciclopedia de fantasía popular de Galicia. Pódese percorrer Galicia a partir de lendas.
-
08Asociación Socio-Pedagóxica Galega
Oferta de unidades didácticas e outros recursos da Asociación Socio-Pedagóxica Galega.
-
09Vídeos musicais
Vídeos e cancións de Mamá Cabra, María Fumaça, As Maimiñas, Sérgio Tannus, A Gramola Gominola...
-
10Exercicios de lingua galega
A web ogalego.eu (ou ogalego.gal), ofrece todo tipo de exercicios de lingua, cun espazo especial pola crise do coronavirus.
-
11Proxecto Terra
O Proxecto Terra é unha colaboración entre o Colexio Oficial de Arquitectos de Galicia e a Xunta para contribuír ao coñecemento dos espazos e lugares que habitamos por parte do alumnado galego.
-
12Para os docentes
Ardora é unha aplicación informática para docentes, que lles permite crear os seus propios contidos web, dun xeito moi sinxelo. exelearning.net tamén é unha aplicación para crear materiais interactivos e está instalado por defecto nos ordenadores do E-Dixgal da Xunta.